CEBU, Philippines - Nagtingkagol karon sa karsel ang usa ka retiradong US Navy human kini pasanginling nanguha og pagkaon sulod sa usa ka dakong uptown mall pasado alas-11 sa miaging buntag.
Ang nasikop mao ang 62-anyos nga usa ka American national ug kasamtangan nga nagpuyo sa usa ka pension house sa barangay Lahug ning siyudad.
Sa pakighinabi sa Banat News ni SPO1 Jeffrey Larrobis, sa Mabolo Police Station mibutyag kini nga ang langyaw gikatahong mikuha og duha ka kartong gatas, tsokolate ug uban pang pagkaon nga wala niya bayri.
Giingong migawas kini hinungdan nga giduol kini sa gwardiya ug gisitar, gidala kini ni Rex Alerta, usa sa mga security officer sa maong mall ngadto sa maong presinto.
Matud pa ni Larrobis nga mokabat sa P208.50 lang ang kantidad sa item nga gikuha sa langyaw, wala pa hinuon matino kung mosang-at og kaso ang maong mall sa maong langyaw. (Lesley Caminade-Vestil/EIM) (BANAT NEWS)