Driver sa konsehal nabulit sa 15 ka samad

CEBU, Philippines -  Kritikal ang kahimtang sa drayber sa usa ka konsehal sa lungsod sa Bantayan human kini dunggaba  15 ka  higayon sa  kontra  sa iyang  anak  didto sa Sitio Kawayan,  barangay Ticad,  lungsod sa Bantayan  sa Bantayan  island  niadtong Biyernes sa alas 6:00 sa gabii.

Ang biktima mao si Frasier Sanchez, 48, minyo, nga   molupyo sa Sitio Punong Ticad,  sa maong  lungsod ug  drayber ni Councilor Art Despi.

Samtang ang suspek mao  usab si Joel Cordova alyas Padong, 23, nga taga  Sitio Bontoy, sa barangay Ticad.

Si PO3 Lou Susvilla sa Bantayan Police  Station  mibutyag  sa Banat News  nga sa sayo  pa ang anak sa biktima nga wala makuha ang pangalan maoy gikaaway sa suspek.

Apan  dihang nahibaw-an kini sa biktima, isip  amahan milaban kini sa iyang anak ug siyay mipalit sa  maong away   batok sa suspek.

Pagkahapon   sa  maong  adlaw  samtang nagbisiklita ang biktima nga  mipalit og  ice sa usa  ka  tindahan   sa ilang  lugar, kalit kining gisugat  sa suspek nga nagsakay  og  motorsiklo.

Mihunong  kini  ug gipahunong  usab  ang  biktima  ug  sa walay daghang  langas, giligid  og  dunggab  ang  biktima  hinungdan  nga  naputos  kini  sa 15 ka samad  dinunggaban.

Dihang  nahagba  ang  biktima  ug  naglunang  sa kaugalingong  dugo  sa  yuta  gihunongan  na  og  panunggab  sa  biktima  dayon  sakay  sa motor  niini  ug  mibiya  sa maong  lugar.

Ang biktima daling gihatud   ngadto sa Bantayan District Hospital apan  gibalhin  usab  dayon kini sa tambalanan dinhi sa dakbayan sa Sugbo ug sa paghimo ning balita wala pa  hisayri  ang  kahimtang niini.

Ang suspek   kinsa  nadakpan  usab  dayon nagtingkagol na karon sa  prisohan sa kapolisan ug gitakdang pasakaan og kaso ugma. (WC)(BANAT NEWS)