26 ka paketeng shabu gisulod sa sudlanan sa gatas nasakpan

CEBU, Philippines -  Nadakpan sa operasyon sa kapulisan ang usa ka gipasanginlang notadong drug pusher sa pinuy-anan niini sa Sitio San Isidro, barangay Perrelos sa siyudad sa Carcar niadtong Huwebes sa alas 11:30 sa gabii.

Ang nadakpan mao si Reynaldo Alcorcon, 44, molupyo sa maong lugar kinsa nakuhaan og 26 ka paketeng dunay sud nga gituohang shabu, ug mga kagamitan sa pag-repack niini.

 Matud ni PO2 Rosendo Benondo, desk officer sa Carcar City Police dihang nahinabi sa Banat News ang pagronda gihimo pinasikad sa search warrant si Regional Trial Court  (RTC) Branch Judge Silvestre Maamo Jr.

Ang kapolisan pinangulohan sa hepe nga si Chief Insp. Teodolfo Manatad III inubanan ni barangay kagawad Wenher Daan miadto sa panimalay sa suspek ug dihang gisiksik ang pinuy-anan nadiskubrehan ang 26 ka pakete sa shabu nga gisud sa sudlanan og gatas ug mga plastic nga gamiton pag-repack niini.

Ang suspek nagtingkagol na karun sa karsel samtang gihikay ang kasong ipasaka batok sa suspek.

Dugang ni Benondo taud-taod na nilang gipanid-an ang suspek tungod sa pagpamaligya niini og gidiling drugas.  (BANAT NEWS)

 

 

 

Show comments