P3M nga budyong gisakmit sa BOC

CEBU, Philippines -  Gibana-banang mokabat sa tres milyones nga kantidad sa budyong ang nasakmit sa kadagkuan sa Bureau of Customs niadtong miaging semana.         

Ang district collector nga si Atty. Ronnie Silvestre mipadayag nga nakadawat sila og taho kalabot sa illegal nga transakyon sa mga budyong. Ang mga budyong gisakay sa usa ka container van sa M/V General Santos sa Lorenzo Shipping Lines diin aduna kini sulod nga kinyentos ka mga karton sa budyong nga dad-on ngadto na sa gawas sa nasud.         

Matud pa ni Silvestre nga ang consignee sa maong kargamento mao ang One Stop Shop Cargo Forwarding Company diin posibleng mapasakaan usab og kaso kun masuta nga kakunsabo sila sa pagpalusot sa budyong.          Dugang pa ni Silvestre nga padayon pa karon ang ilang imbestigasyon pagsusi kon si kinsa ang nagpalusot sa maong budyong.         Samtang dugang pasabot ni Silvestre nga kon ugaling unsa man ang resulta sa ilang gihimong imbestigasyon anha na usab sila mohimo ug aksyon kon malakip bang pasakaan ug kaso ang forwarding company.

Kasamtangan usab nga gipaubos sa heightened monitoring sa BOC ang mga tanang mga gipalusot nga mga shell.          Samtang ang mga budyong gi-turnover na usab sa BOC ngadto sa buhatan sa Bureau of Fisheries and Aquatice Resources nga mihimo usab og imbestigasyon.  (BANAT NEWS)