Ombudsman mosusi sa nahanaw nga P10 M nga bugas

CEBU, Philippines - Ang buhatan sa Visayas Ombudsman mopahigayon og imbestigasyon kabahin sa report sa shortage sa stock sa bugas nga mokabat ngadto sa P10 milyones sa usa sa mga warehouse sa National Food Authority (NFA)-7.

Si Deputy Ombudsman Pelagio Apostol mibutyag sa mga tigbalita nga gi-docket  na nila ang report diha sa pamantalaan isip basehan sa ilang fact-finding investigation kabahin sa giingong rice shortage.

Matud ni Pelagio nga wala pay prosecutor nga mohupot sa imbestigasyon hinungdan nga i-raffle pa nila kini.

Niining sayo pa ang NFA Central Office mipadangat og demand letter ngadto kang Badian NFA officer nga si Benedicto Bernal diin gimanduan kining pabayron og P10,628,095.95  tungod sa maong nahanaw nga bugas ug mag-atubang og kasong administratiba o kriminal kung mapakyas kini sa pagbayad.

Si NFA information officer Lucy Rosales mibutyag sa mga sakop sa media nga nadawat ni Bernal ang nahisgutang suwat niadtong Nobiyembre 16, 2012.

Giklaro ni Rosales nga ang P10 milyones nga ipabayad dili cash apan stock kini nga mokabat sa 4,000 ngadto sa 5,000 ka bag nga mga bugas. Padayon pa silang nagpaabot sa tubag ni Bernal.

Bisan pa sa maong isyu, ang NFA-7  mihatag og kasigurohan nga ang rehiyon dunay igong stock sa bugas sulod sa lima ka buwan.

Ang Commission on Audit maoy nakadiskubre sa giingong shortage sa stocks sa bugas human sila mopahigayon og eksaminasyon dili pa lang dugay.

Giingong ang maong shortage nagsugod kini niadto pang tuig 2007 apan karon pa kini mabutyag tungod kay matud ni Rosales dili sayon ang pagsusi niini nga ilang buhaton matag upat ka bulan sa tuig.

Gawas sa demand letter si NFA Regional Director  Efren Sabong  mimando kini kang Bernal nga iesplikar nganong nagkuwang na ang stock sa bugas sukad pa sa Marso 17, 2007 hangtud sa Hunyo 1, 2012.

Si Bernal maoy gisaligang naghupot sa mikabat P17.5 milyones balor nga bugas ug P3,457.76 milyones nga kantidad sa imported iron-fortified nga bugas.

 Base sa physical inventory na-establisar nga ang shortage sa bugas mikabat ngadto sa 194,452.420 ka kilong imported nga bugas ug 108,394.478 ka kilong iron-fortified nga bugas.

Ang rehiyon-7 duna kini 16 ka mga bodega ug walo niini nahimutang sa probinsiya sa Sugbo diha sa Banilad, Tudela sa isla sa Camotes, Badian, Santa Fe sa isla sa Bantayan ug dakbayan sa Bogo.

Sa dakbayan sa Sugbo dunay duha ka bodega ang NFA nga nahimutang diha sa North Reclamation Area ug barangay Mambaling.  (BANAT NEWS)