CEBU, Philippines - Giaprobahan na sa National Wages and Productivity Commission (NWPC) ang P22 nga umento sa suhulan sa Rehiyon 7 diin gikan sa kasamtangang P305 nga minimum nga suhulan, karon mamahimo na kining P327 sa sunod bulan.
Matud pa ni Regional Director Ma. Gloria Tango sa Department of Labor and Employment ug usab chairman sa Regional Tripartite Wages and Productivity Board atol sa pakighinabi sa Banat News sa ilang buhatan nga ang ilang Board Secretary maoy mipahibalo kaniya pinaagi sa text message nga giaprobahan na ang P22 nga umento sa suhulan sa Rehiyon 7.
Dugang pa ni Tango nga kining maong umento sa suhulan magsugod gikan sa 15 ka adlaw human nga mapublikar.
Gipadayag ni Tango nga kining maong pag-umento makatabang sa mga mamumuo apan napanglantawang duna gyu’y mga kompanyang dili dayon makahatag niini tungod ba kaha sa kahinay sa negosyo. Wala usab magtoo si Tango nga mahimo kining hinungdan nga manirado ang mga kompanya.
Giawhag ni Tango ang mga trabahanteng dili hatagan og hustong suholan sa pagpasaka og pormal nga reklamo diha sa ilang buhatan pinaagi sa pagsuwat ug kinahanglang grupo sila paghimo niini. (EIM)(BANAT NEWS)