CEBU, Philippines - Dul-an sa lima ka libo ang mihatod sa lubong ni Marlon Bellita, radio anchor/reporter ug column writer kagahapon sa Pardo Public Cemetery ning dakbayan sa Sugbo.
Ang paglubong ni Marlon, gihulagway nga gihugopan paghatud sa daghan niyang magdadayeg diin ang prosisyon niini gikan sa balay ni Bellita sa N. Bacalso Avenue sa sydudad sa Talisay hangtud sa Pardo.
Atol sa misa requiem nga gidumala ni Fr. Mike Hisoler sa iyang homily iyang gipahinumdum ngadto sa mitambong ug paryentihan ni Bellita nga bisan pa man og sa sakit nga gidala-dala niini nakahimo lang gihapon sa pagpakatawa si Bellita pinaagi sa iyang programang Rated R.
Gawas sa programa ni Bellita sa DYAB Radio, aduna usab siya’y kolum sa Banat News nga Rated R diin daghan usab ang nagsubay niini ug nalingaw.
Matud pa ni Fr. Hisoler nga ang mga tawo nga wala gayud makakita ni Marlon personally ug igo lang nga nakadungog sa iyang tingog ug nakabasa sa iyang kolum mitunol sa ilang mga hinabang pinansyal tungod sa ka-maayong tawo niini.
Samtang ang presidente sa Media in Cebu South (MICS) nga si Vincie Monterde mipadayag usab nga dako kaayong kuwang sa ilang organisasyon ang pagkawala ni Bellita, gani iya kini nga gihulagway nga ‘emptiness’ ang ilang nabati sa pagkawala ni Bellita.
"Dako kaayo'g kahaw-ang nga wa na si Marlon sa MICS. He was not just a friend to us, he was our brother. Wa na nang kumpetensiya, kay igsuon naman among treatment sa usa’g-usa," pasabot pa ni Monterde.
Gibutyag pa ni Monterde nga bisan og nawala na si Bellita sa ilang organisasyon "magpabilin siya sa among kasingkasing", matud niya.
Sa nasayran, si Bellita maoy labing unang presidente sa maong organisasyon niadtong tuig 2008.
Kahinumdoman nga niadtong buwan sa Oktubre 31, si Bellita gidala sa Chong Hua Hospital human siya ma- stroke nga misangpot sa pagka-comatose niini hangtod nga nakabsan gyud siya sa kinabuhi sa edad nga 41. (WC) (BANAT NEWS)