50 ka buta gibansay paggamit og sungkod

CEBU, Philippines - Mokapin  sa 50 ka mga buta nga gibansay-bansay sa Department of Social Welfare and Development Field Office 7 (DSWD-7) pinaagi sa Vocational Rehabilitation Center II (AVRCII) sa Labangon sa syudad sa Sugbo ang misalmot sa bag-ohay pa lang gisaulog nga White Cane Safety Day (WCSD).

Ang WCSD gisaulog matag tuig aron mapausbaw ug maprotektahan ang pisikal, moral ug sosyal nga pagkatawo  sa Persons with Disablities (PWDs) kun  mga  tawong  may apan  sa ilang  panglawas  nga  migamit  sa puti  nga  sungkod.

Gawas  niini makabaton sila  og igong  kaalam  aron batokan  ang pagkawagtang  sa ilang  umoy  nga  mosalmot  sa  mga  paagi  sa panginabuhi  sa mga  maayo  og  lawas ug  ang angay  nilang  ibutang  sa ilang  mga  hunahuna  nga  may  kaugalingon  usab  silang  abilidad  nga  dili  maapas  sa  mga  maayo  og  lawas. Adunay gipahigayon nga diskusyon nga nag-ulohan og Basic Sighted Techniques ug usab aktuwal nga aktibidad bahin sa  sumbanan sa paggamit og sungkod nga gipangunahan sa tanang AVRC trainees nga nagsilbi nga giya sa mga kliyenteng buta.

Ang maong kalihokan gitak-opan pinaagi sa usa ka mall tour diin ang 21 ka mga buta gihatagan og higayon nga makalibot suroy sa SM City Mall sa North Reclamation Area sa syudad sa Sugbo. Gawas  niini  gipahigayon  usab  ug parte usab  ang usa ka oryentasyon kung unsaon pagsakay ug pagnaog sa mga pampublikong sakyanan sama sa jeep de pasaheroan  ug uban  pa. Samtang anaa sila sa sulod sa mall nakahimo usab sila sa pagpakig-estorya sa ubang personnel sa mall sama sa sales ladies ug mga  kahera  ug usab adunay higayon sa pagdiskobre sa tibook supermarket nga wala nila mabuhat kaniadto ug  mao usab kini ang unang higayon nga nakasakay sila og elevator ug  escalator.

Ang paggamit og white cane gisugdan  niadtong 1921 pinaagi sa  usa ka Bristol nga photographer nga ginganlan og James Biggs kinsa migamit niini aron makatabang kaniya sa paglihok human siya  mapagngi og panan-aw tungod sa usa ka aksidente ug nga gipili niya ang puti nga sungkod aron makit-an gayud siya sa mga pedestrian ug mga motorista.

Ang puti nga sungkod nagsimbolo sa sayon  nga panlihok-lihok  sa mga buta alang  sa pagsalmot nila  sa  mga kalihokan sa komunidad. Ang AVRC usa ka non-residential nga institusyon sa DSWD ug naghatag kini og rehabilitasyon ug serbisyo ngadto sa mga may apan  sa panglawas  pinaagi sa nagkadaiyang kurso nga ilang gitanyag gikan sa Therapeutic Massage, Motor Rewinding, Basic Electronics, Dressmaking, Carpentry, Commercial Cooking ug usab Cosmetology.( /WC) (BANAT NEWS)