CEBU, Philippines - Ang Police Coordinating and Advisory Council (PCAC) mopadala og suwat ngadto sa Campo Crame alang sa formal nila nga hangyo sa pagpatuman sa gun ban sa siyudad sa Sugbo karong Nobiyembre 29 ngadto sa Disyembre 1, 2012 alang sa National Thanksgiving Mass ni San Pedro Calungsod karong Nobiyembre 30 sa South Road Properties (SRP).
Matud pa ni Elizalde nga ang maong lakang gipasubay sa rekomendasyon ni Cebu City Police Office Director Senior Superintendent Melvin Ramon Buenafe. Nagkanayon si Elizalde nga kaliboan ka mga polis ug mga sakop sa Armed Forces of the Philippines (AFP) ang idestino sa siyudad sa maong adlaw.
Samtang si Buenafe sa iyang bahin nagkanayon nga nakaalerto gyud ang ilang grupo sa maong adlaw uban usab sa kooperasyon sa mga volunteers sa pagbantay sa seguridad ilabi na nga dunay mga bisita gikan sa Vatican nga motambong niini.
Nagkanayon si Buenafe nga nakadawat na sila og mga report nga motambong sa maong kalihukan si Presidente Noynoy Aquino ug uban pa nga mga dagkong opisyales sa gobyerno.
Gipanglantawan nila nga moabot ngadto sa usa ka milyon ka mga debotos ni Calungsod ang mutambong niini gumikan kay gawas sa mga pilgrims gikan sa mga simbahan sa Sugbo, mutambong usab ang mga debotos ni Calungsod gikan sa nagkalain-laing bahin sa nasud.
Sayo niini ang kadagkoan sa simbahan miumol og San Pedro Calungsod Safety and Security Committee diin usab sakop niini Buenafe.
Matud pa nga sa AFP pa lang, moabot na sa 2,000 ka mga sundawo ang ipakatap niini sa siyudad sa Sugbo ug mangayo usab sila og dugang personnel sa Police Regional Office (PRO-7). (/WC) (BANAT NEWS)