Pundo alang sa mananagat ug mag-uuma aprobado na

CEBU, Philippines - Aprobado na  ni Governor Gwendolyn Garcia ang  pagpagawas  og  pundo alang  sa  panginabuhi  sa  mga  mag-uuma  ug  mananagat  sa tibuok  lalawigan.

Sumala sa rekomendasyon ni Dr. Mary Rose Vincoy, hepe sa Provincial Veterinarian and Enterprise Development nga mokabat  sa  P7.2 milyones  ang gikinahanglang  pundo alang  niining  maong  proyekto.

Ang maong  proyekto nga ubos  sa  Integrated Coastal Management Project (ICRMP) nagkinahanglan  og  dako  nga pundo kay mao  kini  ang ika -limang hugna sa pagpatuman sa ICRMP Component C project   busa dako kaayo  ang  pundo nga ikatugyan niini  ngadto sa mga asosasyon kun kini aprobahan na sa technical working group nga gipangulohan sa Bureau of Fisheries and Aquatic Resources (BFAR).  Nasayran nga kining maong programa gipatuman sa lalawigan sa Sugbo ubos sa liderato ni Gobernador  Garcia  uban usab sa Bureau of Fisheries and Aquatic Resources (BFAR) nga gipundohan usab sa Asian Development Bank( ADB).

Si Dr. Vincoy nagkanayon  nga tumong sa maong programa mao ang paghatag  og laing  higayon sa  mga mananagat ug mag-uuma sa lalawigan nga may panginabuhian sa panahon nga momenus  ang ilang kinitaan  sa dagat  ug umahan. Nasayran nga  gi-indurso  na sa gobernador  ang 49 ka mga proyekto nga ubos sa ICRMP Component C (Enterprise Development and Income Diversification) sa unang hugna pa lang niining tuiga

Kining  tanan  alang  sa kaayohan  sa tanang  mga  mag-uuma  ug mananagat  sa lalawigan   kun  moabot  ang dimalas  sa ilang  panginabuhi  gumikan  sa dili maayong  lakaw  sa panahon.( WC)(BANAT NEWS)