CEBU, Philippines - Tawgong pilgrim center ug dili devotee city ang tukuron sa kagamhanan sa siyudad sa Sugbo nga maoy kapahuwayan sa mga motambong sa National Thanksgiving Mass ni San Pedro Calungsod diha sa South Road Properties (SRP) karong Nobiyembre 30.
Lahi ang pilgrim center sa naandan na nga devotee city nga tukoron matag Sinulog nga ginama sa mga container vans, may kaugalingong kuryente, tubig, ug linya sa wi-fi alang sa internet.
Ang pilgrim center adunay 50 ngadto sa 70 ka mga tents nga ipahimutang diha sa Compania Maritima nga mamahimong kapahuwayan sa mga pilgrims nga motambong.
Gibanabanang moabot og 3mil ka mga tawo ang maigo sa tukorong pilgrim center nga butangan og bangko ug mga portalets apan dili kini mahimong katulgan sama sa devotee city.
Giawhag ni Konsehal Roberto Cabarrubias ang mga silingang lugar sa dakbayan nga pahuwamon sila og mga tents aron idugang sa pilgrim center sanglit kuwang ang tents sa siyudad gumikan kay ang uban ipamutang man sa SRP diin mahitabo ang Thanksgiving Mass. (BANAT NEWS)