Negosyo ug di love triangle ang motibo

CEBU, Philippines - Adunay kalabutan sa negosyo ug dili love triangle maoy gitan-aw karon sa kapulisan nga maoy hinungdan sa pagpusil patay sa mag live-in partners sa lungsod sa Minglanilla niadtong Miyerkules sa gabii.

Ang kapulisan mipagawas karon og cartographic sketch sa gidudahang mamumuno nila ni Alexander Samson ug Lellosa Flores del Rosario .

Ang hepe sa kapolisan sa lungsod sa Minglanilla, nga si Chief Insp. Timar Alam mibutyag sa diha nga nahinabi sa Banat News nga ila nang gisalikway ang anggulong love triangle kini base sa ilang pagpahigayon og imbestigasyon sa kanhi hinigugma ni Del Rosario nga si Joel Bag-ao. Matud pa ni Alam nga base sa iyang pagpahigayon og interogasyon kang Bag-ao iyang nasuta nga wala kini kapasidad nga mohimo sa maong krimen.

Pasabot pa ni Alam ang armas nga .9mm pistol base sa nakuhang mga basiyo sa bala diha sa crime scene mahalon kini nga armas maong mas dako ang pagtuo ni Alam nga anggulo sa negosyo ang motibo sa krimen.

Gawas niini, adunay duha ka testigo nga nahipos ang kapulisan nga nagpamatuod nga dili si Bag-ao ang mipusil sa mag-live in.

Matud pa ni Alam nga ang mga biktima tigtumod og saging sa kamerkadohan ug mokita matag adlaw og tres ngadto sa kwatro mil  ug dili kalikayang adunay masilo kanila.

Ang maong cartographic sketch gipagawas sa kapolisan sa lungsod sa Minglanilla base usab sa paghulagway sa duha ka saksi diin mibutyag nga lab-as pa sa ilang panghunahuna ang hulagway sa mamumuno.

Dako usab ang pagtuo ni Alam nga gun for hire ang mipusil sa duha hinungdan nga padayon usab silang nagsubay og si kinsa ang mastermind sa maong krimen. (BANAT NEWS)