Patay’ng lalaki nakit-an sa sapa
CEBU, Philippines - Patay nang nakit-an ang usa ka drayber sa traysikad nga gituohang giatake sa sakit nga patol ug nalumos samtang naligo sa sapa sa Sityo Dike, Poblacion sa lungsod sa Barili niadtong Miyerkules sa alas 7:00 sa buntag.
Ang namatay mao si Alex Dandan, 49, nagpuyo sa Sta. Ana Barili kinsa matud pang PO1 Richard Cababat sa Barili Police Station dihang nahinabi sa Banat News nakit-an kini sa usa ka Lemuel Alquisalas nga patay nang naglutaw sa sapa.
Matod pa nasaghiran ni Alquisalas ang patay’ng lawas nga naglubog ilawom sa sapa samtang kini naglangoy sa pagkaligo nianang buntag hinungdan nga gi-report dayun niya kini sa kapulisan.
Sa paghaw-as sa patay’ng lawas didto pa kini mailhi nga gihulagway nga niadto pang adlaw’ng Martes katapusang nakit-an nga naglangoylangoy sa maong sapa.
Giingong aduna kini sakit ug gituohang giatake sa sakit maong nalumos. (BANAT NEWS)
- Latest
