Speaker Belmonte makigkita sa mga supak sa RH Bill

CEBU, Philippines - Gisaad ni House Speaker Feliciano Belmonte Jr. kagahapon nga pakigkitaan ang mga misupak sa kontrobersyal nga Reproductive Health (RH) bill aron sila makombinsir aron mabotohan na kini. “I am going to meet my colleagues who have expressed opposition to the measure so that we can determine the final fate of the measure,” matud pa ni Belmonte sa usa ka interbyu nga gikutlo sa GMA News Tv. Ang maong balaudnon kusganong gisupak sa Simbahang Katoliko ug mihulagway niining pro-abortion ug dakong supak sa pagtulun-an sa Simbahan.

Nagtinguha si Belmonte nga hangyuon ang mga misupak niini nga hunungon na ang paglangay niini tungod kay kini usa ka mahinungdanong balaod.

Ang RH bill naa na sa ikaduhang pagbasa kapin sa usa na ka tuig. Gitapos na ang debate niadtong Agosto apan wala pa ipahibalo kung kanus-a himuon ang pag-amendar sa pipila ka mga probisyong gibabagan sa pipila ka mga magbabalaod tungod usab sa pagsupak sa mga kritiko sa maong balaudnon.

Niadtong milabay’ng buwan adunay gisang-at nga bag-ong bersyon niini diha sa plenaryo sa tuyo nga mapadali ang pagpasar niini sanglit kini usa sa mga prayoridad sa administrasyong Aquino.  (EIM)(BANAT NEWS)