Pribadong basurahan gipasirhan

CEBU, Philippines - Gimando sa buhatan sa Department of Environment and Natural Resources (DENR) 7 ang pagtak-op sa usa ka pribado nga basurahan nga nahimutang pipila  ka metros  gikan sa gitak-opan nga  dumping area sa  barangay Umapad, dakbayan sa Mandaue.

Giluwatan ni Director Fernando Quililan sa  DENR   Environmental Management Bureau (EMB) 7  ang maong  kamandoan human  madawat     ang resulta sa imbestigasyon nga gihimo ni Engineer Amancio Dongcoy kinsa maoy Regional Solid Waste Management coordinator   kinsa  positibo  nga  nagtumbok  sa nahisgutang basurahang  pribado sa maong  lugar.

Nunot sa  maong  mando  sa  pagpasira  niini  gipadayag  ni Director Quililan  ngadto kang Mayor Jonas Cortes ang higpit nga pagpatuman sa Republic 9003 kon Solid Waste Management Act of 2000.

Gisusi   ni Dongcoy   ang maong pribadong   basurahan sa  Umapad human  madawat  ang  reklamo ni Michael Mahusay sa Mandaue Anti Graft Involvement Council Foundation Inc.

Matud pa ni Engr. Dongcoy nga  didto  sa maong  basurahan  makita ang mga  bukong sa lubi ug uban pa nga gituohang gikan sa pipila ka  pabrika. Kahinumdoman nga si Mayor  Cortes  mipatak-op sa dumping area sa barangay Umapad sa miaging tuig  ug gimando  ngadto sa mga barangay kapitan ang pagtukod og kaugalingong Material Recovery Facility (MRF)   aron  matuman  ang waste segregation sa matag panimalay sa dakbayan.

Ang waste segregation  mao  ang  pagbahig  sa basura  nga madugta  ug  di madugta nga  sa  pagkakaron  mao  nay  gipatuman  sa kagamhanan  sa  nasud.  (WC) (BANAT NEWS)