Lalaking nagdala og drugas gipusil patay
CEBU, Philippines - Nalungag ang ulo ug maayong pagkatagak gikan sa motorsiko ang usa ka lalaking dunay dalang ilegal nga drugas nga nagmaneho sa iyang motorsiklo diha sa barangay Lutak siyudad sa Naga niadtong Lunes sa alas 9:05 sa gabii.
Ang biktima nga wala pa adtoa sa mga kabanay atol ning pagsulat sa balita giila lang sa mga tawo sa lugar nga si Roger alyas Prekik nga taga Sangi sa siyudad sa Toledo.
Ang kapulisan nga miresponde sa alarma naka-recover og gamay’ng bag sa patay’ng lawas sa biktima nga dunay sud nga usa ka relo, linikit nga tissue, mga tin foil, gunting ug usa ka sachet nga dunay sud nga gituohang shabu ug kwarta nga 60 pesos.
Matud ni PO1 Clifford Caputolan sa Naga City Police Station dihang nahinabi sa Banat News usa ka wala mailhing lalaking nagmotor ug nagsunod sa biktima maoy mipusil sa luyong bahin sa ulo sa naulahi.
Dihang misaliring ang biktima mipasirit palayo ang mamumuno samtang gisuwayan pagdala sa Minglanilla District Hospital ang biktima apan patay na kini.
Sa paghimo ning balita wala pay tagtungod nga mi-claim sa patay’ng lawas.
(BANAT NEWS)
- Latest
