Pacquiao dili moapil sa NCFP

CEBU, Philippines — Dili moapil si kanhi senador ug boxing legend Manny Pacquiao sa National Chess Federation of the Philippines (NCFP).

Giklaro ni Pacquiao nga iyang gisalikway na niadtong Hulyo ang iyang pagkapili isip bise presidente alang sa Mindanao sa nasudnong kahugpongan.

Si Pacquiao, nga bag-o lang gitudlo isip lead convenor ug secretary sa National Anti-Poverty Commission (NAPC), miingon nga dili siya uyon sa direksiyong gisubay sa NCFP.

Nagpasalamat siya sa pagsalig ug kumpiyansa sa mga miyembro sa NCFP nga mipili kaniya bisan wala siya motambong sa eleksyon.

“Mahal natin ang sports, mahal natin ang kapwa ko mga atleta kaya naman laging nakahanda ako na gawin ang aking makakaya para makatulong,” matud ni Pacquiao.

Ang 47-anyos nga bayani sa sports, nga hilig sab og chess, mipadayag nga nakadawat siya og daghang reklamo gikan sa mga chess player ug club sa tibuok nasud bahin sa dili maayong pagdumala sa pipila ka opisyal. Nakaapekto kini sa pag-uswag sa chess sa nasud.

Wala magkasinabtanay ang NCFP, ubos sa chairman niini nga si Prospero Pichay, ug ang Philippine Chess Association (PCA) ni Pacquiao human wala dawata sa PCA executive nga si Orly Ortega ang mga kondisyon nga gipahimutang sa dugay nang pangulo sa NCFP.

Miingon si Pacquiao nga nakigkita na siya sa daghang opisyal ug mga magdudula sa chess sa tibuok nasud ug nadungog mismo ang ilang mga reklamo.

Mipasalig siya nga motabang sa pagpangita og maayong solusyon sa dugay nang mga problema sa lokal nga chess ug mopasiugda og mga inisyatiba nga magdala og positibong kausaban sa liderato sa pederasyon.