DUMAGUETE CITY , Philippines – Usa ka kanhi labaw sa rebeldeng New Peoples Army sa Communist Party of the Philippines-New People’s Army (CPP-NPA) sa Negros Oriental gipusil patay sa gidudahang iya rang mga kanhi kauban sa kalihokan atol sa bisperas sa Adlaw sa mga Minatay sa lungsod sa Sta. Catalina.
Gikondenar dayon sa mga opisyal sa Philippine Army ug nangangkong kini nagpasabot lang nga malampuson ang Oplan Bayanihan sa militar. Ang Oplan Bayanihan usa ka kampanya batok sa insurhensiya nga tumong mao ang pag-agni sa mga rebelde ug pagtabang kanila nga makabalik sa normal nga kinabuhi.
Giila ang gipatay nga kanhi lider sa NPA mao si Elmo Taburada, residente sa sitio Avocado sa bukirong barangay sa Talalac sa lungsod sa Sta. Catalina, si Taburada adunay tulo ka samad pinusilan nga maoy nakaingon sa iyang hinanaling kamatayon.
Matud pa ni Colonel Marion Sison, ang commander sa 79th Infantry Battalion nga nagbase sa Siaton, Negros Oriental, si Taburada mao ang kanhi vice commander sa Sentro de Gravidad Platoon sa NPA Komiteng Rehiyon Sentral Bisayas-Southeastern Front nga naglihok sa habagatang bahin sa Negros Oriental.
Sayo pa lang niining tuiga mitahan si Taburada diha sa mga sakop sa Philippine Army tungod kay gikapoy na kini sa pakiggubat ug buot nga makauban sa normal niyang kinabuhi uban sa iyang banay diha sa Avocado. Dala ni Taburada sa iyang pagtahan ang usa ka M-16 Armalite Rifle matud pa ni Sison.
Base sa pasiunang imbestigasyon, si Taburada nakaangkon og duha ka samad pinusilan sa iyang dughan ug usa sa tangkugo nga gihulagway nga estilo sa pagpatay sa mga rebeldeng NPA nga buot maningil sa ilang mga kanhi kaubang mibalik na sa sabakan sa balaod.
Sumala pa ni Sison nga si Taburada diha sa usa ka tindahan duol sa ilang balay nianang gabhiuna dihang miabot ang tulo ka wala mailhing mga lalaki ug gidul-itan sa pagpusil gamit ang kalibre .45 pistola.
Usa ka notisya ang nakuha sa mga imbestigador diha sa crime scene nga nangangkong ang NPA maoy mihipos sa biktima tungod sa tulo ka mga hinungdan.
Sumala pa ni Sison, gisuwat diha sa maong notisya gipasanginlan sa NPA si Taburada nga mitabang sa kampanya sa Philippine Army kontra insurhensiya, ikaduha mao ang pagtahan niini sa iyang armas ug ang ikatulo mao ang pag-agni niini sa uban pang mga rebelde nga mobalik na sa sabakan sa gobiyerno.
Tungod niini si Sison moorganisa og rally diha sa Avocado aron kondenahon ang NPA ug makig-diyalogo sa mga molupyo aron masayran nila ang mga programa sa gobiyerno alang sa kalamboan. (/EIM) (BANAT NEWS)