Kandila sa altar natumba bay hapit maugdaw

CEBU, Philippines - Diriyot maugdaw niadtong Huwebes sa gabii ang usa ka balay sa sitio Litmon, Mahayahay, barangay Poblacion, dakbayan sa Talisay human ang kandila nga gisuga nila sa ilang gihalad nga pagkaon  sa  altar  natumba nga  maoy hinungdan sa pagsilaob sa kayo.

Ang maong balay gipanag-iya  sa magtiayong Melecio ug Maymay Allego, 33 ug 27-anyos ang usa  ug  usa.

May  duha  ka andana   ang maong  balay   nga  konkreto  ang silong  ug ang ibabaw nga bahin ginama sa gaan nga  mga materyal  diin  mahimutang  ang  altar  nga  gitarokan  sa  kandila

Sa wala pa mahitabo ang sunog naghalad og mga pagkaon sa ilang altar ang magtiayon ug gisug-an kini og kandila  aron  makakaon  pag-ayo  ang  mga  kalag  sa  ilang  mga  minahal  sa  kinabuhi nga  gidapit  nila  sa maong  higayon.

Human  sangpita  ang  mga kalag  atubangan  sa pagkaon nanganaog ang magtiayon  ug si Maymay  nanihapon   sa silong samtang si   Melecio  milakaw  kay mipalit og beer ug soft drinks nga ihalad  unta  gihapon  sa altar  yawat  makainom  usab  ang  mga  kalag  nga  ilang  gidapit  sa maong  higayon.

Apan pagbalik ni Melecio   maoy  nakita niini  nga  misilaob na ang kayo sa kwarto diin sila maghalad. Si Melecio abtik kaayong mikabya og tubig ngadto sa nasunog nga kwarto lakip ang ilang mga silingan mitabang usab   pinaagi  sa paggamit  og balde, palanggana  nga  gisudlan   og  tubig  aron   pagpawong sa  kayo.

Ang mga sinena, bag ug ubang gamit  nga didto  sa kwarto  naugdaw  ang tanan.

Kun  wala  pa mapawong  dayon, peligro  kaayo  nga  makatabok  ang  kayo  ngadto  sa  mga  kasikbit  nga  balay  niini  nga nagsikit-sikit  lang, sumala  sa  magtiayon.

Ang kabomberohan sa siyudad dali nga  miresponde sa maong sunog apan pag-abot nila  sa maong lugar  napawong na ang kayo.

Nakapanaad  si Melecio nga sa sunod  higayon  nga  maghalad  sila  dili na lang sila magdagkot og kandila ug anha na lang sila maghalad og mga pagkon sa ubos nga bahin sa ilang balay   sa sunod kalag-kalag. Ang  ubang  mga silingan  sa magtiayon  nagkanayon  nga malagmit  naglagot  ang  mga  kalag  nga gikapoyan  og  saka ngadto  sa ikaduhang andana sa maong  balay  hinungdan  nga nanghagis  ug  gitumba  ang kandila. (/WC) (BANAT NEWS)