CEBU, Philippines - Naangol ang manag- uyab human malimbuwad ang motorsiklo nga ilang gisakyan gumikan sa iro nga ilang naligsan didto sa highway sa Sitio Bayong, barangay Guimbuwangan, lungsod sa Barili niadtong Biyernes sa gabii.
Ang mga naangol mao ang drayber sa motorsiklo nga Honda Wave kolor itom nga si Junifel Agrabio Catayas, 22, ulitawo, nga taga barangay Bulokbulok, Barili ug ang iyang uyab nga si Mary Grace Gingoyon, 17, nga taga barangay Campangga, Barili nga maoy iyang angkas
Si SPO3 Elmer Opsema sa Barili Police Station mibutyag sa Banat News nga samtang nagdagan sila gikang nanuroy sa lungsod sa Dumanjug paingon na unta silang mamauli dihang pag-abot nila sa dulhugon nga bahin sa karsada sa dapit nga nahitaboan wala mabantayi ni Catayas ang iro nga milabang sa karsada.
Walay nahimo si Catayas gawas sa pagdasmag na lang gyud sa iro apan dihang nagkisikisi kini nawad-an og panimbang ang maong drayber nga misangpot sa pagkalimbuwad sa motorsiklo, samtang sila nga nagsakay nanglupad usab og pila ka metros ug mitugpa sila sa sementadong karsada nga maoy hinungdan sa pagpangabali sa ilang kabukogan.
Gihatud dayon sila ngadto sa Barili District Hospital apan gibalhin usab dayon sila sa tambalanan sa dakbayan sa Sugbo gumikan sa katalandugon sa kahimtang sa ilang lawas. (Darrel A. Carumba/WC) (BANAT NEWS)