Mimasyada og pekeng kuwarta diha sa buwangan nasakpan

CEBU, Philippines - Gidemalas ang usa ka masyador sa buwangan human masakping nagpalusot og daghang mga mini nga P1,000 ug P500 atol sa gipahigayong derby sa Aloguinsan Cockpit sa lungsod sa Aloguinsan niadtong Biyernes sa alas 8:35 sa gabii nunot usab sa nagsingabot nga kapistahan sa maong lungsod. Ang gidakop mao si Gerry Paler, 44, nagpa-ilang masyador sa buwangan ug lumad nga taga barangay Tunga-tunga, Maasin sa Leyte.

Moabot 22 ka mining tag P1,000 ug laing 22 ka buok tag P500 ug tulo ka buok tag P200 ang nasakmit sa kapulisan gikan kaniya nga moabot  og P33,600 apan mini.

Matud ni PO2 Rolly Navarro sa Aloguinsan Police Station dihang nahinabi sa Banat News ang manager sa maong buwangan nga si Ignacio Moreno nanawag sa ilang buhatan ug mipahibawo sa gihimo sa suspek  nga pagpusta og mini nga kuwarta.

Ang suspek nagsige og masyada sa matag manok nga gitari ug kun mapildi peke nga kwarta maoy iyang gipangbayad sa iyang kontra.

Apan nabulilyaso kini human nasakpan nga mini nga P500 ug ang P200 nga iyang gibayad sa iyang kontra hinungdan nga kini gikomprontase sa ubang sugarol hinungdan nga nagkagubot.

Sa pag-abot sa mga polis naabtan pa ang suspek nga padayon og panugal ug ilang gikomprontase ug gisiksik tungod sa reklamong mini nga salapi ang iyang mga kwarta ilang nasakpan ang maong mga mini nga salapi.

Ang suspek gidakop ug gibalhog sa maong karsel ug gikatakdang pasakaan og kaso karong Lunes sa buntag. (EIM)(BANAT NEWS)