CEBU, Philippines - Dul-an sa 50 ka mga Cebuano ug mga Filipino uban sa mga langyaw nga nagbase sa nasud sa Australia nga mga deboto ni Beato Pedro Calungsod nga mangadto unta sa Vatican alang sa kanonisasyon ni Calungsod ang nangailad sa usa ka travel operator nga misakiyo sa ilang kwarta nga gibanabanang dul-an P11 milyones.
Si Margarita Maria Matheu, ang secretary sa Calungsod Committee dinhi sa Sugbo miingon nga may nanawag kaniya niadtong Martes gikan sa usa ka airport sa Australia ug mipahibalo sa ilang pagkailad.
Matud pa ni Matheu ang mga deboto andam na untang mobiyahe padulong sa Roma ug kuhaon na nila unta ang ilang mga tiket diha sa airport apan nadiskubrehan na lang nilang wala sila sa listahan sa mga pasahero.
Ang mga biktima sagad mga Sugboanong doktor nga nagtrabaho ug namuyo na sa maong nasud. Sumala pa niya nahibawo siyang dunay grupo sa mga debotong Filipino diha sa Australia tungod sa tsirman sa Duaw Lungsod nga si Fr. Marnell Mejia. Si Mejia miadto sa Australia niadtong 2008 uban sa grupo sa mga katekistang Sugboanon diin ilang gisabwag ang estorya sa kinabuhi ni Calungsod. Diha sa ilang mga kalihokan naila nila ang maong pundok sa mga Sugboanon ug uban pang mga Filipino ug sukad niadto nahimo nang deboto ni Calungsod.
Tungod sa ilang debosyon sa Sugboanong mamahimo na unyang ikaduhang Filipinong Santos karong Oktubre 21 wala matarog sa pagpangilad kanila sa travel operator ang hitabo ug namalit na lang sila og laing tiket nga balor 5,000 Australian dollars (P214,498.50) matag usa aron lang makapadayon sa ilang pagtambong sa kanonisasyon.
Ang grupo atoa na karon sa Roma nga nagpaabot sa kanonisasyon nga mahitabo karong Domingo. Ang ilang reklamo batok sa travel operator ilahang ipadayon sa pagkahuman na sa kanonisasyon.
Sa laing bahin, matud pang Matheu giaprubahan sa Italian Embassy ang tanang aplikasyon sa visa pangadto sa Roma nga dunay endorsement gikan ni Cebu Archbishop Jose Palma ug Archbishop Emeritus Ricardo Cardinal Vidal. Ang uban gipasidan-ang kinahanglang ipresentar nila ang ilang visa sa maong embahada ini og balik nila gikan sa Roma. Adunay 4,000 pilgrims gikan sa Sugbo ang atoa na karon sa Roma.
Kagahapon naabot na ang grupo gikan sa Sugbo nga naghatud sa imahen ni Calungsod sa Roma.
Gisugat kini sa mga Filipinong pari didto ug gidala sa ilang kapilya sa ilang gipuy-an. (BANAT NEWS)