CEBU, Philippines - Si Konsehal Nida Cabrera sa siyudad sa Sugbo naglaom nga sa sunod semana boluntaryo nang mohawa ang mga namuyo sa mga luna sa Barangay Luz sa dili pa ipatuman ang demolisyon.
“Hinay-hinay na silang midawat sa among offer. So nanghinaut mi nga ini’g Lunes limpyo na ang maong lugar,” si Cabrera pa.
Matud pa niya, aduna nay mga pamilya nga midawat sa offer nga P15,000 (kung boluntaryong mobakante sa luna) ug ang uban miduol na pud sa ilang grupo alang sa susamang kasabutan.
Si Cabrera, kinsa kanhi barangay kapitan sa maong lugar ug kasamtangang presidente sa Nangka Homeowners Association (NHA), nagkanayon nga ang sitio Lubi na lang ang ubay-ubay pa nga pamilya ang wala mikihol sa notisya sa korte. Adunay 32 ka mga balay sa sitio Lubi, Nangka ug Mabuhay sa barangay Luz ang malakip sa demolition order nga giluwatan sa korte.
Matud pa ni Cabrera, gihatagan na lang sila hangtud karong umaabot nga Lunes sa pagbiya sa maong nahisgutang mga lugar, ug sa Martes sa buntag i-serve na pag-usab sa sheriff ang maong order.
Matud pa ni Cabrera aduna nay mga relocation site alang sa mga 32 ka households nga maapektahan sa demolition. Sa laing bahin, si Cabrera miingon nga ang asosasyon ang mopili sa mopuli sa mga mabakanteng mga luna ug sila obligahon unya nga mobayad sa mga nagasto sa NHA. (BANAT NEWS)