Beato Pedro Calungsod nagpakita

CEBU, Philippines - Mga deboto sa umaabot nga ikaduhang Santos nga Filipino nga si Beato Pedro Calungsod giingong nagpakita pinaagi sa usa ka aparisyon diha sa iyang simbahan sa barangay Cantabaco, dakbayan sa Toledo. Si Rosenda Camomot, 57-anyos, usa ka manindahay diha sa lugar nangangkong gipakitaan  ni Beato Calungsod kinsa gikatakda nang ibayaw pagka-Santos sa Vatican sa Roma karong Oktubre 21 ning tuiga. Matud ni Camomot nga  mga alas 12:30 sa udto niadtong Huwebes samtang nagpahimutang siya og buwak diha sa altar sa Blessed Pedro Calungsod Parish Church nakabantay siya og usa ka tawong nagduko apan naglakaw-lakaw sa sulod nga daw dunay gipangita.

Giobserbahan niya ang lihok sa maong tawo ug dihang miagi siya duol niini paingon nga mokuha sa balde diha duol sa pultahan sa simbahan namay-ongan niyang susama kini og dagway ni Beato Pedro Calungsod.

Gihulagway ni Camomot nga ang maong tawo limpiyo ang pamanit ug kasarangan ra ang pamarog, ang buhok niini itom ug gitunga ang hinapay sama sa hitsura sa mga gihimong imahen ni Calungsod. Ang maong lalaki nagsul-ob og itom nga karsones, nag-tsinelas, puti nga long-sleeved nga t-shirt sama sa camisa de chino sama gyud sa opisyal nga imahen ni Beato Calungsod nga gidala ngadto sa Vatican alang sa kanonisasyon.

Human makuha ang balde, si Camomot milingi pagbalik sa maong tawo apan nawagtang na kini. Gibutyag ni Camomot nga dili lang kadto ang unang higayon nga nagpakita si Beato Calungsod.

Niadtong milabay’ng tuig nagpakita usab kini kaniya sa guba nga kapilya nga daw mibasa sa poster samtang nagkaon og pan, matud pa niya sa sunod higayong mopakita kaniya si Calungsod iyaha na kining estoryahon.

Matud usab ni Camomot nga sukad nga nagsige siya og ampo kang Calungsod ang tanan niyang gipangayo gihinay-hinay niini og tubag.

Si Tino Lombrino, usa ka lay minister sa maong simbahan nagkanayon nga niadtong tuig 2008 walay kuryente niadto ang Cantabaco apan nasurpresa siya dihang iyang nakita ang simbahan nga pwerting hayaga bisan gabii na.

 Ang imahen ni Calungsod diha sa altar ang nahanaw apan sa iyang pagmata mga alas 2:00 sa kaadlawon nakita niyang nabalik na ang imahen niini sa nahimutangan.

Si Padre Russel Emmanuel Sungcad, parish priest sa maong simbahan mibutyag nga sukad pa niadtong Marso 2006 nga sobra na sa napulo ka mga parokyano ang mipaambit sa ilang kasinatian kabahin sa pagpakita ni Beato Calungsod kanila.  (BANAT NEWS)