Hubog nga tomboy nadasmagan angol

CEBU, Philippines - Talandugon  ang  kahimtang   sa  usa ka tomboy nga giingong  nakainom  ug nagsusapinday    nga  naglakaw sa karsada apan  nadasmagan sa bus pasaheroan didto sa highway sa barangay Obong, sa lungsod sa Dalaguete, niadtong Huwebes sa alas 5:00 sa hapon.

Ang biktima mao si Flordeluna De Leon, 24, dalaga, nagpuyo sa maong lugar, kinsa  gihulagway nga may  pagka -tomboyon.

Samtang ang nakadasmag kaniya mao ang Sunrays Bus nga adunay plaka nga GWOP-884 nga gimaneho ni Carlos Alecanda, 56, minyo,  nga taga   barangay Lagunde lungsod sa Oslob.

Si PO2 Godofredo Glipa sa Dalaguete Police Station mibutyag  sa Banat News  nga ang Sunrays Bus  gikan sa lungsod sa Oslob ug nagbiyahe  paingon sa siyudad sa Sugbo nga adunay sakay nga mga pasahero.

Samtang ang biktima gihulagway nga nakainom ug nagwandog- wandog og lakaw sa karsada paingon na untang mopauli.

Apan ang   driver  sa Sunrays  Bus nga  nahiagi sa maong lugar, wala dayon makabantay sa biktima ug tungod kay naapekihan na,  wala na makontrolar  niini  ang  manobela  sa sakyanan  hinungdan  nga   nasabak  sa bumper  ang biktima  ug nalagpot  kini  og pipila ka metros  nga gilay-on.

Daling  gisakwat  sa  konduktor ang biktima ug gihatud dayun   ngadto sa Ildefonso Alcantara Memorial Hospital sa lungsod ,apan gibalhin kini   sa tambalanan  sa dakbayan sa Sugbo .

Samtang ang drayber sa Sunrays Bus boluntaryo  usab dayong mitahan sa kapolisan ug kasamtangang nabalhug sa karsel samtang gihikay ang tukmang sumbong nga ipasaka batok kaniya. (/WC) (BANAT NEWS)