Drug den ni-raid ng PDEA: 4 timbog

LUCENA CITY, Philippines —- Apat na kalalakihang sangkot sa operasyon ng ilegal na droga ang naaresto makaraang buwagin ng Philippine Drug Enforcement Agency (PDEA) ang isang drug den sa isinagawang joint anti-illegal drug operation sa Purok Rainbow, Barangay Ibabang Dupay sa lungsod na ito kamakalawa.
Batay sa ulat, isinagawa ang operasyon dakong alas-9:33 ng gabi sa pangunguna ng PDEA Quezon Provincial Office, katuwang ang PDEA Marinduque Provincial Office at Quezon Maritime Police Station.
Kinilala ang mga naaresto sa kanilang mga alyas na “Jazer,” 42-anyos, na umano’y nagpapatakbo ng nasabing drug den; “Jancy,” 35; “Jef,” 39; at “Jennifer,” 46-anyos; pawang residente ng Purok Rainbow, Brgy. Ibabang Dupay, Lucena City.
Nakumpiska sa operasyon ang apat na transparent plastic sachet na naglalaman ng hinihinalang shabu na may kabuuang pitong gramo at tinatayang nagkakahalaga ng P47,600.
Nahaharap ang apat na suspek sa mga reklamong paglabag sa Sections 5, 6, 7, 11 at 12, Article II ng Republic Act No. 9165 o Comprehensive Dangerous Drugs Act of 2002.
- Latest
















