Digital MySSS Card i-integrate sa eGovPh superapp

CEBU, Philippines — I-integrate sa eGovPH superapp ang digital MySSS Card ug pipila ka serbisyo sa Social Security System (SSS) aron mas sayon ug dali na’ng ma-access sa mga miyembro ang ilang social security records.

Gisunod kini sa data-sharing agreement nga gipirmahan sa SSS ug Department of Information and Communications Technology (DICT) niining ulahi lang.

Ubos sa kasabotan, ma-access na sa mga miyembro ang digital nga version sa ilang MySSS Card ingon man ang history ug kinatibuk-ang ihap sa ilang kontribusyon, pinakabag-ong membership type ug impormasyon sa ilang employer pinaagi sa eGovPH superapp.

Matud sa SSS makatabang kini sa mga miyembro sa pagsusi kon na-post ba ang ilang mga kontribusyon ug kon husto ba ang ilang membership ug employer information nga dili na kinahanglan mogamit og lain-laing aplikasyon. Matud ni SSS President ug Chief Executive Officer Victor Alfonso Limlingan lakip sa tumong sa integrasyon ang pagpalapad sa access sa mga serbisyo sa ahensiya ilabina sa mga digital worker sama sa freelancers ug online professionals.

Gipirmahan nila ni Limlingan ug DICT Secretary Robert Joseph de Claro ang kasabotan isip kabahin sa paningkamot sa gobiyerno nga mahiusa sa usa ka digital platform ang nagkalain-laing serbisyo sa mga ahensiya sa gobiyerno. (BANAT NEWS)