Maigo sa demolisyonsa Ermita, way relokasyon

CEBU, Philippines — Walay relocation site nga gihatag ang kagamhanan sa Dakbayan sa Sugbo ngadto sa mga 23 ka mga balay nga apektado sa demolisyon sa Barangay Ermita.

Kini ang ikumpirma sa barangay kapitan sa Ermita nga Mark Miral nga wala pay gihatag nga relocation site ang Division for the Welfare of the Urban Poor (DWUP) alang sa mga apektadong pamilya sa pagkakaron.

Matud pa niya nga ang Department of Social Welfare Services (DSWS) niproseso na sa ilang mga kinahanglanon aron makadawat sa pinansyal nga tabang nga tag P20,000.

Gipasabot usab ni Miral nga adunay mga dugang o extended nga bahin sa balay nga wala pa maapil sa lista sa mga apektado, apan gipasalig ni Mayor Nestor Archival nga tabangan usab ang mga pamilyang maapektuhan sa demolisyon.

Si Miral nagkanayon nga ang mga apektadong residente sa demolisyon nagpuyo sa maong lugar sukad pa niadtong 2019 human sa nahitabong sunog.

Niadtong panahona, nangayo sila og igong panahon nga makapabilin didto tungod kay wala silay laing kapuy-an.

Apan, nalangan ang pagpangita og laing kapuy-an tungod sa pandemya ug pipila kanila ang naghinayhinay nalang og nakatukod pag-usab sa ilang mga balay apan kasagaran sa mga gitukod mga barong-barong lang tungod kay aduna kini kasabutan nga kung pangayuon na og balik sa gobyerno ang maong yuta, kinahanglan nila nga hawanan ang maong yuta.

Karon nga hingpit na nga gamiton sa kagamhanan ang luna nga ilang gitukuran og mga balay, gipasabot og pag-ayo Miral ang mga apektadong residente nga gikinahanglan ang ilang koordinasyon aron nga makatabang sa pagpaayo sa drainage system ug mokunhod ang pagbaha sa syudad. (BANAT NEWS)