P36.47 milyon nga infrastructure project sa Moalboal nalangan

CEBU, Philippines — Lima ka proyektong sa imprastraktura sa Lungsod sa Moalboal nga nagkantidad og ?36.47 milyones ang nalangan sa pagkompleto diin nakapugong kini sa mga residente sa tukmang panahon sa paggamit sa mga pasilidad, matud sa Commission on Audit (COA).

Ang lima ka proyekto nagkantidad og kinatibuk-ang ?36,472,007.57 nga naglakip sa pagpalapad sa opisina sa Coast Guard, pagtukod og mga welcome signage sa 15 ka barangay, rehabilitasyon sa mga dalan sa Poblacion West paingon sa Panagsama, pag-ayo sa mga dalan sa Poblacion West ug pagkonkreto sa dalan sa Barangay Agbalanga.

Ang pagpalapad sa Coast Guard office nga nagkantidad og ?1.998 milyon nalangan og 35 ka adlaw tungod kay giukopar pa sa mga namaligya ang lugar ug nalimpiyohan lang kini niadtong Disyembre 16, 2024.

Samtang, ang proyekto sa pagtukod og welcome signage sa 15 ka barangay nga nagkantidad og ?4.49 milyones nakadawat og duha ka extension nga niabot ngadto sa 90 ka adlaw.

Ang unang extension nga 60 ka adlaw tungod sa mga problema sa right-of-way sa upat ka dapit sa Barangay Lanao, Tomonoy, Poblacion East ug Tunga.

 Ang ikaduhang extension nga 30 ka adlaw gihatag tungod sa dili maayong kahimtang sa panahon. Ang rehabilitasyon sa mga dalan gikan sa Poblacion West paingon sa Panagsama sa Barangay Basdiot nga nagkantidad og ?9.995 milyones nalangan usab og 50 ka adlaw tungod sa pag-usab sa gilapdon sa dalan gikan sa unom ka metros ngadto sa 6.7 metros.

Ang maong kausaban nakaapekto sa sakop sa trabaho ug nanginahanglan sa pagbalhin sa mga kasamtangang pasilidad lakip ang mga linya sa kuryente ug tubo sa tubig nga nahimutang sulod sa right-of-way sa proyekto.

Matud usab sa COA nga ang maong kahimtang nagpakita nga posibleng wala matuman sa hingpit ang gikinahanglang pag-survey ug pagtimbang-timbang sa disenyo atol sa pagplano sa proyekto.

Ang laing proyekto sa pag-ayo ug rehabilitasyon sa mga dalan sa Poblacion West, nga nagkantidad og ?9.997 milyones nakadawat og 40 ka adlaw nga extension tungod sa grabeng kahuot sa trapiko nga nalambigit sa dungan nga proyekto sa Department of Public Works and Highways (DPWH).

Ang proyekto sa pagkonkreto sa dalan sa Barangay Agbalanga nga nagkantidad og ?9.983 milyones mao ang adunay pinakataas nga extension nga nikabat sa 135 ka adlaw.

Lakip sa mga rason ang gahi nga bato nga nakapainit pag-ayo sa excavator ug ang dili matag-an nga pag-ulan.

Gipadayag sa COA nga ang maong mga pagkalangan nagpakita sa posibleng kakulangan sa pagtuman sa mga giya sa detalyadong engineering ubos sa 2016 Revised Implementing Rules and Regulations sa Republic Act No. 9184. Girekomendar sa COA nga sulbaron sa munisipyo ang mga isyu sa yuta ug lugar sa proyekto sa panahon pa lang sa pagplano.

Sa ilang tubag, miila ang municipal management sa mga bahin nga kinahanglan pauswagon ug nipasalig nga palig-onon ang koordinasyon sa mga ahensiya, manginahanglan og sinulat nga kompirmasyon sa pagkaandam sa mga lugar ug magpatuman og site-clearing mechanism sa dili pa pinal ang schedule sa procurement.  BDB BANAT NEWS