Kaslunon, napaig sa sunog

CEBU, Philippines — Nakit-an nga patay ang usa ka 30-anyos nga lalaki sulod sa iyang nasunog nga balay sa Sitio Malabago, Barangay Buguil, Moalboal, Cebu, sa buntag niadtong Domingo, Oktubre 11.

Giila lamang ang namatay sa alyas nga “Rey.” Nadiskubrehan ang iyang lawas human mitubag ang kapolisan sa human sila gitawgan ni Barangay Buguil Captain Rolie Cabasag kalabot sa sunog.

Base sa inisyal nga imbestigasyon sa kapolisan, nakadungog og kusog nga buto ang silingan sa namatay pasado alas 5:30 sa buntag. Sa dihang gisusi niya ang nahitabo, nasunog na ang balay sa biktima.

Misulay ang mga silingan sa pagpalong sa kalayo, apan mga 500 metros ang gilay-on sa pinakaduol nga laing puy-anan gikan sa balay, nga nakapalisod sa dali nga pagtabang.

Narekober usab sa mga otoridad ang cellphone ug kuwarta sa biktima, nga nakagawas na sa balay sa wala pa kini hingpit nga masunog.

Sa pagsusi sa lugar, nakita sa Bureau of Fire Protection (BFP) ang usa ka butane canister nga mibuto.

Nakarekober ang mga sakop sa Scene of the Crime Operatives (SOCO), uban sa kapolisan, og usa ka nasunog nga Intratec .9mm nga armas, duha ka basiyo sa bala, usa ka deformed slug sulod sa chamber sa armas ug usa ka walay sulod nga magazine.

Sumala sa amahan sa biktima, nag-inusara na lang nagpuyo si Rey ug nag-atiman og mga kanding ug baboy.  Gikatakda na unta kini nga magpakasal sa iyang kapuyo nga anaa sa Taiwan, nga si alyas “Karen” sa sunod tuig.

Samtang, mihangyo ang kapolisan og autopsy aron matino ang tukmang hinungdan sa pagkamatay sa biktima ug masuta kung adunay foul play sa iyang kamatayon.

 Padayon pang gisusi sa mga otoridad ang mga sirkumstansiya sa sunog ug pagkamatay ni Rey. Wala pa matino sa imbestigasyon kung unsay hinungdan sa sunog ug kung adunay kalabotan ang nakit-ang armas sa pagkamatay sa biktima. (BANAT NEWS)