Tour guide sa canyoneering activity sa Badian gisuspenso

CEBU, Philippines — Usa ka tour guide sa canyoneering activity sa Lungsod sa Badian ang gisuspenso sulod sa usa ka bulan human ni-viral ang video sa usa ka foreign vlogger nga nagpakita sa giingong dili angay nga pamatasan sa guide ngadto sa turista.

Gikompirma ni Badian Tourism Officer Earl Vincent Endab nga gipahamtangan og suspension ang maong guide human namatikdan sa Municipal Tourism Office ang video nga nahitabo sa niaging bulan.

Matud ni Endab nga mas nikatag ang maong video human adunay viewer nga nipadayag og feedback kabahin sa nahitabo nga maoy nakapukaw sa atensiyon sa tourism office. Ug tungod niini, gi-review sa tourism office ang insidente ug nisunod sa angay nga proseso ubos sa mga lagda sa munisipyo alang sa mga tour guide.

Ubos sa Municipal Ordinance No. 18-2026 o ang Revised Badian Kawasan Canyoneering Ordinance of 2026 gidili ang bisan unsang porma sa discourtesy, harassment, extortion ug uban pa’ng conduct of unbecoming sa pagdumala sa canyoneering activity.

Gibutyag ni Endab nga usa ka bulan ang suspension nga gipatuman batok sa guide ug ang P1,000 nga multa ug community service isip kabahin sa sanction.

Ang guide nga adunay kapin sa duha ka tuig nga kasinatian isip tour guide nibuhat usab og public apology ngadto sa foreign tourist pinaagi sa iyang official Facebook account.

Sa iyang apology, giangkon ni James Agravante ang iyang sayop ug nangayo og pasaylo sa mga pulong nga iyang nasulti nga mahimong nakapasakit o nakahatag og dili maayong pagbati sa turista.

Sa pagkakaron, anaa sa 1,600 ang trained canyoneering guides sa Badian diin ang 1,000 niini ang accredited

Giangkon ni Endab nga dili kini ang unang higayon nga adunay guide nga nasuspenso tungod sa lain-laing insidente ug apil sa kasagarang reklamo ang conduct unbecoming base sa feedback sa mga turista. (BANAT NEWS)