MCIA nakadawat pag-usab og ACI recognition
CEBU, Philippines — Gi-ila na pag-usab ang Mactan-Cebu International Airport (MCIA) isip usa sa mga Best Airports sa Asia-Pacific sa 5-15 million passenger category ubos sa Airport Service Quality (ASQ) program sa Airports Council International (ACI).
Ikaduhang sunod-sunod nga tuig kini nga nakadawat sa maong recognition ang MCIA, nga gipadagan sa Aboitiz InfraCapital Cebu Airport Corporation (ACAC).
Misaka usab ang MCIA gikan sa Level 2 ngadto sa Level 3 sa ACI Airport Customer Experience Accreditation, nga nagpakita sa pagpalig-on sa implementasyon sa mga programa alang sa kasinatian sa mga pasahero.
Matud ni Aboitiz InfraCapital vice president ug head of Airports Rafael M. Aboitiz, ang mga pamuhunan sa imprastraktura, teknolohiya, operasyon ug connectivity nagtumong sa mas luwas, episyente ug konektadong biyahe sa mga pasahero.
Samtang, miingon si ACAC General Manager Ricia Montejo nga ang mga recognition nagpakita nga nabati sa mga pasahero ang mga pagpaayo sa airport ug nasukod kini batok sa global standards.
Lakip sa dagkong kausaban sa MCIA ang CEB Connects, nga gilusad niadtong Abril 2025 aron pasimplehon ang air-to-air transfers. Gipamubo niini ang minimum connection time alang sa domestic-to-domestic transfers gikan sa 60 ngadto sa 35 minutos, samtang 60 minutos na lang ang gikinahanglang oras alang sa ubang connecting flights.
Kapin 500,000 ka pasahero na ang natabangan sa CEB Connects sukad sa paglusad niini.
Nakadawat usab ang MCIA og Level 2 Airport Carbon Accreditation niadtong Agosto 2026, isip pag-ila sa carbon management ug mga lakang niini sa pagpakunhod sa emissions, lakip ang 1.64-megawatt-peak rooftop solar installation, energy-efficiency measures ug paggamit og smart sensors ug LED lighting.
Ang pagpalambo sa MCIA gipadayon ubos sa public-private partnership tali sa Mactan-Cebu International Airport Authority ug ACAC, uban sa suporta ug pagdumala sa Department of Transportation ug Civil Aviation Authority of the Philippines. (BANAT NEWS)
- Latest
