Coastal cleanup gihimo sa siyudad sa Lapu-Lapu
CEBU, Philippines — Mga boluntaryong diver misalum sa kadagatan sa Lapu-Lapu City kagahapong adlawa, Septiyembre 19, aron mangolekta ug magdokumento sa mga basura sa dagat isip kabahin sa pagtimaan sa International Coastal Cleanup (ICC) 2026 pinaagi sa tinuig nga Scubasurero marine cleanup sa siyudad. Ang kalihokan nga gitawag og “Scubasurero 2026: Diving for Clean Seas, Building Resilient Communities” nagtigom sa mga opisyal sa siyudad, environmental groups, pribadong sektor ug mga boluntaryong diver nga nanglimpyo ilawom sa dagat dapit sa Hilutungan Channel.
Gipangulohan sa City Environment and Natural Resources Office (CENRO) ug ni Lapu-Lapu City Mayor Ma. Cynthia “Cindi” King-Chan ang kalihokan nga nagtutok dili lamang sa pagtangtang sa mga basura ilawom sa dagat, kondili usab pagdokumento sa mga klase sa basura nga makita sa katubigan sa dakbayan.
Kabahin ang inisyatiba sa Adopt-a-Reef advocacy sa siyudad ug sa kampanyang “Atong Dagat, Atong Ugma.”
Matud ni King-Chan, adunay direktang kalambigitan ang pagpanalipod sa marine ecosystems sa siyudad sa panginabuhi sa mga mangingisda, coastal communities ug tourism workers, lakip na ang pagpreserbar sa marine biodiversity.
Giawhag usab niya ang mga residente nga malikayan nga maabot sa basura gikan sa panimalay ang mga kanal, sapa, agianan sa tubig ug dagat.
Mitambong sa kalihokan si DENR Region VII Regional Executive Director Laudermir Salac, CENRO Head Jocelyn Abayan, mga representante sa Philippine Coast Guard, environmental groups, diving organizations, hotels ug uban pang pribadong sektor. Samtang, miapil usab ang siyudad sa simultaneous ICC cleanup nga gipangulohan sa Department of Environment and Natural Resources (DENR) Region VII uban sa CENRO.
Napulog lima ka coastal cleanup areas sa mainland ug island barangays ang gipahimutang alang sa kalihokan, diin miapil ang mga national government agencies, city ug barangay officials, mga eskwelahan, environmental organizations, pribadong kompanya ug mga boluntaryo.
Si Lone District Representative Junard “Ahong” Chan, sa laing bahin, nanawagan alang sa padayong pagpanalipod sa baybayon, ilabina pinaagi sa pag-edukar sa mga batan-on. (CEBU NEWS)
- Latest
