BOC-Cebu nilapas sa target collection

CEBU, Philippines —  Nilapas sa ilang target nga kolektahonon ang Bureau of Customs Port of Cebu para sa bulan sa Agosto ning tuiga.

Ang adwana nakakolekta sa bulan sa Agosto og P4,061,858,713.18, sobra og P86.85 milyones sa target nilang P3,975,002,780.97 anang buwana nga sobra 2.19 percent sa ilang collection target.

Matud pa sa pamahayag sa BOC Cebu, dako kaayo og natampo sa pagsaka sa koleksyon ang Subport of Mactan ug ang Subport of Dumaguete sa kinatibuk-ang koleksyon anang bulana.

Sa Subport of Mactan palang, naka-kolekta na kini og P534,792,471.76 sobra kaayo sa ilang target nga Php 179,764,200.00. Naa silay surplus collection nga P355,028,271.76 o 197.50 percent ang pagsaka. Wala sab palupig ang Dumaguete tungod kay nakakolekta sila og P683,860,642.10 nga mas dako kumparar sa ilang target nga P582,996,480.00 o sobra og P100,864,162.10 nga sobra og 17.30 percent sa ilang target.

Matud pang District Collector Atty. Zsae Carrie C. De Guzman kaning taas nga koleksyon resulta ni sa gipalambo nilang revenue monitoring, hustong customs valuation ug assessment, ug dedikasyon sa mga kawani niini.

“This achievement reflects the consistent work of our personnel and the cooperation of our stakeholders. Beyond meeting our revenue responsibilities, we remain focused on ensuring that our processes are efficient, transparent, and responsive to the needs of the trading community,” matud pa ni De Guzman. Gipasalig ni De Guzman nga magpadayun ang adlawan sa Sugbu sa paghingusog sa koleksyon niini uban sa pakig-koordinasyon sa mga sangang buhatan niini para sa epektibong koleksyon ug pagsunod sa mga balaod ug regulasyon sa adwana. (BANAT NEWS)