Medical scholarship program sa probinsiya gipalapdan

CEBU, Philippines — Gipalapdan sa Kagamhanan sa Probinsiya sa Sugbo ang ilang medical scholarship program aron mas daghang estudyante ang makatuman sa ilang damgo nga mahimong doktor.

Gikan sa unang 40 ka benepisyaryo, misaka na kini ngadto sa 72 ka medical scholar human giapil usab sa programa ang mga nagpadayon na og eskwela nga nawad-an sa ilang miaging scholarship.

Gipahibawo kini ni Cebu Gov. Pamela Baricuatro atol sa pagsugod sa selebrasyon sa ika-457 ka Founding Anniversary sa Lalawigan sa Sugbo diin opisyal usab nilang giabiabi ang mga scholars gikan sa Cebu Normal University-Vicente Sotto Memorial Medical Center (CNU-VSMMC).

Sa kinatibuk-an, 42 ang first-year students, 22 ang second-year students ug walo ang third-year students nga makadawat sa scholarship.

Matud ni Capitol Piso Health Consultant Dr. Nikki Catalan, una nilang gisaad ang pagtabang sa 40 ka first-year medical students, apan ilang nasayran nga adunay 22 ka second-year ug walo ka third-year students nga naputol ang ilang scholarship.

Tungod niini, nakadesisyon ang Kapitolyo nga ilakip usab ang maong mga estudyante aron dili maputol ang ilang pag-eskwela ug aron mapadayon ang ilang pagpaningkamot nga mahimong mga doktor.

"In this conversation we found nga mas beneficial pud sa province kay mas dali man sila mabalik pud as return of service nila. So nikuha nalang pud mi nila so from 40 the total commitment is 72 na medical scholars," dugang niya.

Ang scholarship naggikan sa kasabutan nga gipirmahan sa Pebrero tali sa Lalawigan sa Sugbo, Cebu Normal University ug Vicente Sotto Memorial Medical Center aron matabangan ang mga kwalipikadong estudyante nga wala masakop sa Medical Scholarship and Return Service Program sa Commission on Higher Education.

Ubos sa programa, ang matag tuig nga suporta nga madawat sa scholar katumbas usab og usa ka tuig nga return of service human sila makagradwar ug makapasar sa physician licensure examination.

Gilauman nga ang mga scholars maoy mopuno sa panginahanglan sa mga doktor sa 16 ka Capitol-run hospitals sa lalawigan. Matod pa ni Catalan, karong tuiga gikan sa Office of the Governor ang pondo sa programa, apan gitinguha sa Kapitolyo nga aduna na kini kaugalingong budget item sugod sa sunod tuig aron mapadayon ang scholarship sa umaabot.

Dugang niya, human makapasar sa board exam ang mga scholars, adunay awtomatikong higayon nga makaserbisyo sa mga ospital sa lalawigan ubos sa ilang return service, samtang mahimo usab silang makabenepisyo sa practice-based residency programs sa probinsiya. (BANAT NEWS)