Di makigbalik, gipatay
CEBU, Philippines — Patay ang usa ka 21-anyos nga babayeng estudyante human giingong gidunggab sa iyang kanhi uyab sulod sa ilang balay sa Purok 4, Barangay Poblacion, Sibonga, Cebu, kagahapon Sabado sa buntag, Agosto 1, 2026.
Ang biktima giila sa kapulisan nga si alyas Risa, 21, college student ug residente sa maong lugar. Ang gipasanginlang suspek mao si alyas John, college student sad ug residente sa Purok 13, Barangay Tubod, Sibonga.
Base sa inisyal nga imbestigasyon sa Sibonga Municipal Police Station, upat ka tuig ng manag-uyab ang duha, apan nagbuwag sa miaging buwan.
Padayon pang gisusi sa kapulisan ang tinuod nga hinungdan sa ilang panagbulag. Matud pa, nibisita ang suspek sa balay sa biktima kinsa kauban atong higayona sa iyang igsuon, apan migawas ang igsuon ug gibiyaan ang duha.
Giingong gi-lock sa suspek ang pultahan sa kwarto ug didto gisultihan ang biktima nga gusto niyang makigbalik.
Apan dili na gustong makigbalik sa biktima ug diha matud pa gidunggab kini sa suspek og kutsilyo gikan sa kusina. Naigo ang biktima sa nagkalain-laing bahin sa lawas, lakip ang liog.Human sa krimen, giingong nagdunggab sa iyang kaugalingong liog ug dughan ang suspek aron maghikog.
Sa gawas sa balay, nakatawag na sa mga otoridad ang mga tawo apan pagabot nila sa sulod patay na ang biktima, samtang ang suspek nagkadugo apan buhi pa maong gidala nila kini a sa Carcar District Hospital.
Padayon ang imbestigasyon sa Sibonga Municipal Police Station aron matino ang hinungdan sa maong insidente. (BANAT NEWS)
- Latest
