‘Nilupad’ og 6 metros, patay
CEBU, Philippines — Patay ang usa ka 25-anyos nga rider human mabanggaan sa garbage compactor truck sa South Road Properties (SRP) (Northbound) sa Barangay Ermita, Cebu City, sayong buntag niadtong Biyernes, Hulyo 31.
Ang biktima giila nga si Francis Duallo, lumad nga taga-Inabanga, Bohol, apan temporaryong nagpuyo sa lungsod sa Consolacion ug nagmaneho og usa ka Suzuki Raider 150 nga motorsiklo.
Base sa inisyal nga imbestigasyon sa Traffic Enforcement Unit sa Cebu City Police Office (TEU-CCPO), nagpadulong sa northbound lane ang garbage compactor truck nga gimaneho ni Leslie Ignacio Cañiban sa dihang kalit nga misulod sa pikas lane ang motorsiklo sa biktima nga gikan sa southbound lane.
Giingon sa kapulisan nga gituohang kusog ang dagan sa motorsiklo ug naigo niini ang center island maong nalagpot kini padulong sa lane nga gisubay sa garbage truck.
Tungod sa kusog sa impact sa bangga, nalabay ang biktima og kapin unom ka metros ug nakaangkon og grabeng mga samad sa lawas.
Gidala pa siya sa Cebu City Medical Center (CCMC), apan gideklarang dead on arrival (DOA) alas 2:35 sa kaadlawon.
Padayon pa ang imbestigasyon sa kapulisan aron matino ang eksaktong hinungdan sa aksidente.
Gikonsiderar sa mga otoridad ang posibilidad sa pagpasaka og kasong reckless imprudence resulting in homicide and damage to property, depende sa resulta sa imbestigasyon.— IBM BANAT NEWS
- Latest
