Way ordinansa batok sa pagkatulog sa aseras

CEBU, Philippines — Mihangyo ang Cebu City Anti-Mendicancy Office (CCAMO) kang Konsehal Pastor “Jun” Alcover Jr. nga mopanday og ordinansa sa pagdili sa pagkatulog ug paghigda sa mga pampublikong lugar lakip na ang mga sidewalks ug dagkong kadalanan sa siyudad.

Namugna ang maong hangyo human sa Facebook post ni Alcover kun diin gidayeg niini ang kalimpyo sa Iloilo City kun diin gipahigayon ang kalihokan sa Philippine Councilors League.

“Limpyo… kusog asenso… wa koy nakitang natug sa sidewalk ug makilimos… just an observation,” matud ni Alcover sa iyang post.

Gisaysay sab sa konsehal kung unsa kadisiplinado ang mga tawo kun diin atol sa iyang pagsuroy-suroy sa pier, kasapaan ug bisan asa, wa siya’y nakit-an nga nanglutaw nga basura ug wa sab siya’y nakit-an nga nanglimos ug wa sab siya’y nakit-ang nangatug sa dalan.

Gihulagway sa konsehal nga ang iyang nasinati sa Iloilo City nagpakita sa importansya sa disiplina isip pundasyon sa kalamboan sa usa ka dakbayan.

Mitubag dayon ang CCAMO pinaagi sa pag-tag sa konsehal ug gipadayag nga bisan pa sa ilang walay hunong nga operasyon batok sa manglimos ug batok sa mangatulog sa mga pampublikong lugar, lisod gihapon ang pagpatuman tungod sa kakuwang sa espesipikong ordinansa nga nagdili sa pagtulog sa mga sidewalk ug ubang pampublikong lugar.

“Bisan unsaon og badlong, 24/7 atong operasyon, apan mobalik lang gihapon. Murag kinahanglan na gyud nato og usa ka malig-on nga ordinansa aron mas malig-on ang pagpatuman,” matud pa sa CCAMO.

Giklaro sa CCAMO nga dili  ni silot para sa mga walay balay  apan para ni ang ordinansa sa tanan aron mapanalipdan ang katawhan, mamentinar ang kahapsay, ug masiguro ang kaluwasan sa tanan.

Sa pagpakighinabi ni Alcover sa The Freeman ug Banat News, giangkon niini nga wala siya’y kasayuran nga walay ordinansa ang syudad nga direktang nagdili sa pagkatulog sa sidewalks.

Sa panahon sa administrasyon ni kanhi mayor Michael Rama, gipahigayon ang mga clearing operations aron tangtangon ang mga street dwellers ug mga tawo nga nangatulog sa mga sidewalk sa Colon Street, P. del Rosario ug uban pang dalan sa syudad.

Gitukod usab ang temporaryong pasilidad sa South Road Properties diin gidala ang mga street dwellers aron makapahuway sa gabii. Usa kini sa programa nga gipadayon ni Mayor Nestor Archival.

Apan bisan pa sa paningkamot sa mga mayor nga mahipos ang mga mangatulog sa dalan daghan gihapon ang mobalik sa ilang pwesto aron didto matulog, apil ani  diha mismo sa palibot sa Cebu City Hall. — Caecent No-ot Magsumbol, IBN BANAT NEWS