Mont Property Group nisumite og progress report

CEBU, Philippines — Gisumite sa Mont Property Group ang ilang progress report alang sa Hunyo 2026 nga naglatid sa mga flood control ug mitigation measures nga gipatuman sa Monterrazas de Cebu development diha sa Barangay Guadalupe, Dakbayan sa Sugbo.

Gipahibalo sa Mont nga operasyonal ang mga detention pond ug andam sa pagtipig sa tubig uwan panahon nga mobunok ang uwan.

Gipadala ang suwat niadtong Hulyo 8, 2026 ngadto sa buhatan ni Guadalupe Barangay Captain Apol Ross Enriquez aron nga masunod ang Cebu City Council Resolution No. 17-3039-2026 nga nagmando sa regular nga paghatag og updates kalabot sa mga proyekto sa flood mitigation.

Gipadalhan usab og kopya ang konseho, City Planning and Development Office ug ang Department of Environment and Natural Resources–Environmental Management Bureau alang sa monitoring ug compliance.

Nalatid sa report ang mga kalihukan ug monitoring nga gipahigayon gikan Mayo 29 hangtud Hunyo 25 ning tuiga diin gipahibalo ang kahimtang sa maintenance sa detention ponds ug drainage, pag-instolar og rain gauges ug monitoring panahon sa kusog nga pag-uwan sa Montelago Development, YJ Area ug Detention Pond No. 5 sa The Rise.

Sa Hunyo 12 ngadto sa 18 ug Hunyo 19 ngadto sa 25, ang mga detention pond sa Montelago, YJ Area ug Detention Pond No. 5 anaa sa 100 porsyento ang kapasidad nga makatipig og tubig uwan.

Nahuman na usab ang pagtukod sa mga drainage culvert sulod sa Montelago Development ug na-instolar na ang duha ka rain gauges sa Mont Property Office ug sa Montecima Clubhouse aron mapalig-on ang pag-monitor sa gidaghanon sa tubig uwan sulod sa proyekto.

Nalatid usab sa report nga ang nahitabong kusog nga uwan niadtong Hunyo 3, 2026 diin human sa mga inspeksiyon gikan Mayo 29 hangtud sa Hunyo 4 ilang namatikdan nga gamay ra kaayo ang tubig uwan nga natigom sa Montelago, YJ Area ug Detention Pond No. 5.

Walay natala nga surface runoff gikan sa Monterrazas development padulong sa Guadalajara Road atol sa pagbunok sa uwan diin nasawo sa detention ponds sa Montelago Development ang tubig uwan ug wala kini makaabot sa ubos nga mga lugar.

 Base sa engineering plan, ang Montelago Development adunay kinatibuk-ang detention pond storage capacity nga 23,226 cubic meters samtang ang YJ Area adunay 13,717 cubic meters.

 Gipakita usab sa report nga ang ubang kasamtangan ug gisugyot nga detention ponds, lakip ang Proposed Detention Pond No. 14 adunay planong kapasidad nga 3,310 cubic meters.

Samtang, human sa kusog nga uwan niadtong Hulyo 30, 2026 diin naglunop sa nagkadaiyang bahin sa siyudad, nipahibalo ang Mont nga nagpadayon sa pagtipig og tubig uwan ang ilang mga detention pond. BDB BANAT NEWS