Daghang mga lugar sa Metro Cebu gibahaan

CEBU, Philippines — Gibaha ang pipila ka bahin sa Metro Cebu atol sa pagbunok sa ulan kagahapon, Hulyo 30, 2026 ug gani naay nahitabong emergency response operations ang Cebu City Disaster Risk Reduction and Management Office (CCDRRMO) nga gihimo tungod sa mga apektadong mga residente.

Sa Cebu City, gibahaag maayo ang Sitio Dakit sa Barangay Guadalupe kay nitupong na sa basketball ring ang tubig baha. Tungod ana, gipabakwit ang mga residente. 

Gibahaan sab ang Osmeña Boulevard, Sitio Tambisan ug La Paloma Subdivision sa Barangay Tisa, Bonifacio Street, Katipunan Street sa Labangon, Ayala Access Road, Sitio Sacred Heart sa Labangon, N. Bacalso Avenue, Kinasang-an, Tagunol, Basak Pardo, ug Sitio Kawayan sa Guadalupe.

Sa Zapatera Elementary School, M.J. Cuenco Avenue sa Tinago ug Sabellano Street sa Punta Princesa, nilapas na sab sa ibabaw sa tuhod ang lebel sa tubig baha.

 Samtang, taga-hawak na sab ang baha sa atubangan sa E-Mall ug abot sa dughan ang baha sa Sitio Laray sa Panagdait. Naa say pagdahili sa yuta sa Miramonte, Barangay Pit-os ug natabunan ang katunga sa karsada.

Ang Mahiga Creek nakarehistro og 2.5 metros nga water level, samtang ang Kinalumsan River miabot sa 4 metros.  Ang Guadalupe River misaka sa 1.5 metros ug ang sapa sa Tejero-Tinago nakasukod og 2 metros.

Matud pa ni Konsehal Dave Tumulak kinsa chairman sa Cebu City Disaster Risk Reduction and Management Council (CCDRRMC) magpadayun ilang monitoring samtang nagpadayon ang pag-uwan sa Metro Cebu. Nagpakatap sab si Mayor Nestor Archival og upat ka bus sugod alas 5:00 sa hapon kagahapon para matabangan ang mga na-stranded nga pasahero sa rota sa Bulacao paingon sa City Hall ug Guadalupe paingon sa City Hall, samtang adunay ruta sa Talamban paingon sa City Hall ug Lahug paingon sa City Hall.

Mandaue City

Sa Mandaue City,  nigamit na og balsa nga hinimo gikan sa styrofoam, plywood ug pisi ang mga tawo para lang makalabang ang mga estudyante ug trabahante sa baha sa usa ka residential compound sa Barangay Cabancalan, Mandaue City.

Sa pakighinabi kagahapon, Hulyo 30, si Christine Cagara, usa sa mga residente, miingon nga napugos sila paghimo ani kay dili na maagian ang ilang lugar tungod sa pila ka adlaw nga pagbaha.

Si Cagara, nga maoy nagkuha sa viral nga video diin makita ang iyang anak nga gisakyan sa makeshift balsa, miingon nga nagsugod ang ilang kalisod niadtong Lunes, Hulyo 27, human sa padayon nga pag-uwan sa miaging semana.

Nagkasabot ang mga residente nga maghimo og balsa tungod kay delikado na kung motusmod sila sa baha ilabi sa mga batang mangeskuyla ug sa mga manarbaho.

Ang tubig natigom sukad pa adtong Hulyo 24 nga pag-ulan ug wala nay hubas-hubas tungod kay kada adlaw gaulan.  Nigamit sila og water pump pero kuwang ra kay nahimong catch basin ang ilang lugar sa tubig nga gikan sa Sitio Nasipit, Barangay Talamban, Cebu City.

Midangop na siya sa Office of the Mayor diin nadugangan ang mga water pump nga gipakatap sa lugar pero bisan nahubas na ang tubig adtong

 Martes, Hulyo 28, wala na nila bungkaga ang balsa kay basin molunop na pud sa ila.

Gawas sa baha, nabalaka  sila sa sakit nga leptospirosis ug dengue tungod sa baha.  Hangyo nila karon nga himoan og permanenteng solusyon sa ilang problema.

Sa pakighinabi kang Cabancalan Barangay Captain FK Remedio nga dili kaniadto bahaon ang maong residential compound nga naay kapin 30 ka mga balay sa sulod ug mga 50 pa ka balay sa duol nga subdivision nga naapektuhan sa bag-ohay nga pagbaha.

Gibasol ni Remedio ang usa ka pribadong kompanya sa lugar nga maoy nitabon sa natural nga agianan sa tubig padung sa maong swamp.

Matud niya ilaha na karong gisabutan sa pribadong kompanya, Office of the Building Official (OBO), ug mga residente ang posibleng solusyon.

Nag-esmiringhoy nasakpan

Arestado ang usa ka 32-anyos nga minyo nga lalaki ug ang giingong iyang babayeng kabit sulod sa usa ka motel sa Happy Valley Road, Barangay Guadalupe, Cebu City, pasado alas-4 sa kaadlawon kagahapon Huwebes, Hulyo 30.

Giila lamang sa mga awtoridad ang lalaki sa alyas nga “Mark,” usa ka tourist photographer ug residente sa Barangay Quiot. Samtang ang babaye nga iyang kauban giila usab sa alyas nga “Chrystal,” 29, residente sa Barangay Calamba.

Base sa impormasyon, walay hibangkaagan ang duha nga gisundan na diay sila sa asawa sa lalaki nga giila sa alyas nga “Sara,” 31 anyos.

Dihang nakompirmar gyud sa asawa nga naa sa sulod sa usa sa mga lawak sa maong motel ang iyang bana kauban ang us aka babaye nagpatabang dayun kini sa Guadalupe Police Station.

Tuod man, sa dihang giadto na ang maong motel ug naabtan sa duha sulod sa usa ka lawak. Naputol ang ilang pagtagay sa lawasnong kahinam.

Matud sa asawa sa mga polis, dugay na niyang gidudahan ang iyang bana nga adunay laing karelasyon. Ang asawa nga determinado nga mopasaka og reklamo batok sa iyang bana ug sa babaye.—   IBM BANAT NEWS