Duha nasakmitan og mga armas

CEBU, Philippines — Duha ka lalaki ang nangadakpan sa managlahing operasyon batok sa illegal nga armas diha sa Toledo City ug Cebu City.

Sa Toledo City, nadakpan ang usa ka 47-anyos nga lalaki nga giila lamang sa alyas nga “Poypoy” atol sa pagpatuman sa search warrant sa iyang pinuy-anan sa Rafols Street, Barangay Poblacion, alas-8:03 sa gabii niadtong Martes, Hulyo 28. Ang operasyon gilusad human sa mga reklamo nga giingong kanunay manghulga ang suspek gamit ang armas.  Usa niini ang giingong pagpanion niini og armas niadtong Hulyo 18 sa Barangay Poblacion.

Pinasikad sa search warrant nga giisyu sa Regional Trial Court Branch 59 sa Toledo City gidakop ang suspek human nakuhaan iyang balay og usa ka .45-caliber pistol nga walay serial number, usa ka steel magazine ug tulo ka buok live ammunition.

Nadakpan usab ang usa ka 28-anyos nga lalaki nga giilang si alyas Alfien, taga Sitio Pailub, Barangay Sambag I, Cebu City, human nakuhaan og .9mm Tauyrus revolver uban sa mga bala nga walay lisensiya adtong gabii , adlaw nga Miyerkules, Hulyo 29.

Sumala ni Police Lieutenant Colonel Franco Rudolf Oriol, deputy city director for administration sa Cebu City Police Office, miresponde ang Tracker Team sa Police Station 2 human makadawat og report nga adunay lalaking nagdala og armas sa R. Landon Extension, Barangay Sambag I.

Sa pag-abot sa mga polis, naaktohan gyud siya nga giluklok ug dalidali sa suspek ang armas diha sa iyang hawak. – IBM BANAT NEWS