Parehas nga porsyento

CEBU, Philippines — Sa System Loss cap gisu Mihangyo ang Cebu Electricity Rights Advocates (CERA) sa Energy Regulatory Commission (ERC) ug sa nasudnong gobyerno nga ipatuman ang usa ka parehas nga 5.5 porsiyentong system loss cap alang sa tanang power distributor.

Suma sa grupo nga ang kasamtangang polisiya dili patas sa mga konsumidor nga giserbisyuhan sa mga electric cooperative ug nakababag sa pagpalambo sa mga sistema sa pag-apod-apod sa kuryente.

Sa gipagawas nga pamahayag, giingon sa CERA nga ubos sa kasamtangang polisiya, gitugotan ang mga pribadong distribution utility (DU) sama sa Visayan Electric (VECO) ug Mactan Electric Company (MECO) nga makarekober hangtod sa 5.5 porsiyento nga system loss gikan sa mga konsumidor, samtang ang mga electric cooperative, lakip ang CEBECO I, II ug III, mahimong makarekober hangtod sa 12.5 porsiyento.

Ang system loss mao ang kuryenteng mawala atol sa pag-apod-apod tungod sa teknikal nga mga hinungdan sama sa kainit nga mogawas sa mga linya sa kuryente, ingon man sa dili teknikal nga mga hinungdan sama sa pagpangawat og kuryente ug ilegal nga koneksiyon.

Gibana-bana sa billing data niadtong Enero 2026, usa ka panimalay nga mokonsumo og 200 kilowatt-hours (kWh) ubos sa pribadong distribution utility mahimong mobayad og kinatas-ang system loss charge nga P140.  Apan kung parehas ang konsumo apan sakop sa electric cooperative, mahimong mobayad kini og mga P280 tungod sa mas taas nga gitugot nga cap.

Matud ni CERA Convenor Nathaniel Chua, ang maong kalainan maoy hinungdan nga mas mahal ang bayranan sa kuryente sa mga konsumidor nga anaa sa franchise area sa mga electric cooperative.

Dugang ni Chua nga ilang nakita nga usa sa mga nag-unang hinungdan sa pagsaka sa bayranan sa kuryente sa mga electric cooperative mao ang ilang taas nga system loss cap.

Gipasidaan usab sa grupo nga ang kasamtangang polisiya makapaluya sa pinansyal nga kahimtang sa mga electric cooperative.

Matud pa niya nga kung molapas sa gitugot nga cap ang aktuwal nga system loss, ang cooperative mismo ang moako sa alkansi.

Tungod niini, matud ni Chua nga makuhaan ang pondo alang sa mga importanteng proyekto, pagpaayo sa sistema ug bisan sa suweldo ug suporta sa mga empleyado.

Apan matud sa grupo, ang hingpit nga pagtangtang sa system loss charges mahimong supakon sa industriya sa kuryente. — MEL BANAT NEWS