BDH nakapahigayon og appendectomy sa unang higayon

CEBU, Philippines — Malampusong napahigayon diha sa Bantayan District Hospital (BDH) ang unang emergency (STAT) appendectomy, usa ka mahinungdanong kalamposan sa pagpalapad sa serbisyong surgical alang sa mga lumulupyo sa Isla sa Bantayan.

Ang emergency nga operasyon gihimo niadtong Hulyo 24 ubos sa pagpangulo ni surgeon Dr. Delvin Marquez, uban ni anesthesiologist Dr. Pascual Gongon ug first assistant nga si Dr. Melben Jochico.

Matud sa opisyales sa ospital nga ang malamposong operasyon nagpakita nga andam na ang pasilidad sa pagdumala sa mga emerhensiyang operasyon nga dili na kinahanglan dayong i-refer ang mga pasyente ngadto sa mga ospital sa mainland Cebu.

Ang operating room sa tambalanan hingpit na nga operational human na-instolar ang bag-ong surgical equipment kabahin sa padayon nga paningkamot sa kagamhanan sa probinsiya sa pagpalig-on sa serbisyong panglawas sa mga district hospital ubos sa administrasyon ni Gobernador Pamela Baricuatro.

Matud ni Dr. Elise Nicole Catalan, Provincial Piso Health Consultant nga ang pagpalapad sa surgical services gitumong aron mapaduol ang importanteng serbisyong panglawas ngadto sa mga komunidad ilabina sa mga nahimulag nga lugar sama sa Isla sa Bantayan.

Gikan sa Hulyo 23 hangtud sa 25, 2026 nakahimo ang ospital og walo ka surgical procedures.

Niadtong Hulyo 23, 2026 lima ka minor operations ang gihimo lakip ang pagtangtang og bukol sa agtang, pagtangtang og bukol sa wala nga tiil ug tulo ka wound debridement procedures alang sa mga pasyenteng gi-admit sa ospital.

Niadtong Hulyo 24, 2026 gawas sa emergency appendectomy nipahigayon usab ang ospital og dilation and curettage (D&C) procedure nga gipangulohan ni obstetrician-gynecologist Dr. Anna Maureen Sios-e, uban ni Dr. Gongon isip anesthesiologist.

Niadtong Hulyo 25, 2026 gihimo usab sa ospital ang mesh hernioplasty nga gipangulohan ni Dr. Marquez uban ni Dr. Gongon isip anesthesiologist ug ni Dr. Deco Tagadan isip first assistant. Matud ni Catalan nga ang surgical services sa Bantayan District Hospital gilaoman nga makapamenos sa panginahanglan sa mga pasyente nga mobiyahe pa ngadto sa mainland Cebu ilabina sa panahon sa emerhensiya samtang makapakunhod usab sa gasto sa biyahe ug makapaayo sa pag-angkon sa tukmang panahong medikal nga pag-atiman.

Gipasalamatan usab niya si Bantayan District Hospital Chief of Hospital Dr. Nicolas James Najarro ug ang mga doktor, nurses ug ubang kawani sa ospital sa ilang paningkamot nga nahimong posible ang pagpalapad sa surgical services. — /BDB (BANAT NEWS)