Clean Toilet Stops program gihingusgan sa Kapitolyo

CEBU, Philippines — Nagpadayon ang Kagamhanan sa Probinsiya sa Sugbo sa pagpangita og dugang lokal nga pangagamhanan ug pribadong establisamento nga mahimong kabahin sa Clean Toilet Stops Partnership Program.

Tumong sa maong programa nga masiguro nga adunay maagian nga pansayan o kasilyas ang publiko sa nagkalain-laing bahin sa lalawigan samtang nagbiyahe o nisuroy sa Sugbo.

Matud ni Provincial Tourism Officer Rowena Montecillo, padayon ang panawagan sa Kapitolyo ngadto sa mga lungsod, siyudad ug pribadong negosyo nga iparehistro ang ilang kasilyas aron mahimong opisyal nga kabahin sa programa.

Giingon ni Montecillo nga andam usab ang Kapitolyo sa pagtabang sa mga moapil aron mapadayon ang kahinlo ug kaayohan sa ilang mga pasilidad.

“Pwede na aron makahibaw ang tanan nga daghan tag available toilets, wala lang ta kahibalo asa,” matod ni Montecillo.

Sumala niya, daghan nang kasilyas ang mahimong magamit sa mga biyahero apan kulang ang kahibalo sa publiko kung asa kini nahimutang.

Sa pagkakaron, 17 na ka partner ang nalista sa Clean Toilet Stops Partnership Program ubos sa administrasyon ni Gobernador Pamela Baricuatro.Lakip sa mga miapil sa programa ang mga gasolinahan, bus terminal, bus stop, boardwalk, pampublikong merkado, plaza ug uban pang establisamento nga anaa sa nagkalain-laing lugar sa lalawigan.

Gilusad sa Kapitolyo ang programa pinaagi sa pagpirma sa memorandum of agreement uban sa mga lokal nga pangagamhanan ug pribadong partner aron mapalig-on ang panagtambayayong sa paghatag og limpyo nga kasilyas alang sa publiko.

Ubos sa maong kasabutan, ang Cebu Provincial Tourism Office maoy magdumala sa pagmonitor sa programa ug pag-ila sa mga miapil pinaagi sa opisyal nga signage, tourism mapping ug paglakip niini sa mga materyales sa promosyon sa turismo sa lalawigan.

Gikinahanglan usab ang mga partner nga magmintinar sa ilang kasilyas nga limpyo, luwas ug magamit sa oras sa operasyon, lakip ang igo nga suplay sa tubig, hustong pagdumala sa basura, maayong bentilasyon ug suga, ingon man ang paghatag og sabon ug tissue.

Sa mensahe ni Gobernador Baricuatro atol sa pagpirma sa kasabutan, iyang gipadayag nga bisan ang yano nga pasilidad sama sa kasilyas adunay dakong papel sa kasinatian sa mga turista nga mobisita sa Sugbo.

Midugang ang gobernador nga dili lamang sa gidaghanon sa mga turista masukod ang kalampusan sa turismo, kondili sa kalidad sa serbisyo ug kasinatian nga mahatag sa mga bisita aron mobati sila nga komportable, luwas ug giabiabi samtang nagsuroy sa lalawigan. (BANAT NEWS)