Presyo sa diesel ug kerosene mosaka-DOE

CEBU, Philippines — Managlahi nga paglihok sa presyo sa mga produktong petrolyo ang masinate sugod karong adlawa diin ang diesel ug kerosene posibleng mosaka hangtod P4.62 matag litro

Ang gasolina mahimong mosaka o mokunhod hangtod P1 matag litro, samtang gilauman ang dakong pagsaka sa presyo sa diesel ug kerosene, sumala sa Department of Energy (DOE).   

Sa virtual press conference kagahapon, si DOE Secretary Sharon Garin miingon nga ang presyo sa gasolina mahimong mokunhod hangtod P1 matag litro o mosaka usab hangtod P1 matag litro.

Samtang, ang presyo sa diesel gilauman nga mosaka sa P2.62 ug P4.62 matag litro, samtang ang kerosene mahimong mosaka gikan sa P2.22 hangtod P4.22 matag litro. Matod ni Garin, ang gipagawas nga forecast nagpakita sa pinakataas nga posibleng adjustment base sa kasamtangang lihok sa internasyonal nga merkado.

 Iyang gipasabot nga ang padayon nga pag-usab-usab sa presyo sa lana sa kalibutan tungod sa nabanhaw nga tensiyon sa Middle East, ilabina ang kabalaka sa posibleng pagkabalda sa Strait of Hormuz, usa sa pinakabusy nga ruta sa pagbiyahe sa mga barkong nagkarga og lana sa kalibutan.

Matod ni Garin, sugod sunod semana, posible nga dili na magpagawas ang ahensya og range sa adjustment sa presyo, kondili ang pinakataas o pinakagamay lamang nga posibleng adjustment, bisan rollback o pagsaka sa presyo.

Ang maong kausaban gituyo aron mas mapanalipdan ang mga konsumidor ug aron ang lokal nga presyo sa mga gasolinahan mas tukma sa kahimtang sa internasyonal nga merkado sa lana.

Gipasalig ni Garin sa publiko nga ang DOE nagpadayon sa hugot nga pagmonitor sa mga kalamboan sa kalibutan ug nagpatuman og mga lakang aron mapanalipdan ang seguridad sa enerhiya sa nasod. (BANAT NEWS)