LTO-7 modugang og deputized traffic enforcer

CEBU, Philippines — Gitinguha sa Land Transportation Office sa Central Visayas (LTO-7) nga madugangan ngadto sa labing menos 500 ang gidaghanon sa mga deputized traffic enforcement personnel sa tibuok rehiyon.

Samtang nangandam usab kini sa paglusad sa kaugalingong enforcement application aron mapalig-on ang pagpatuman sa mga balaod sa trapiko.

Matud ni LTO-7 Regional Director Atty. Wendell Dinglasan, kapin sa 200 ka mga personnel na ang ilang nadeputize ug padayon pa nilang palapdan ang programa pinaagi sa pakigtambayayong sa Philippine National Police (PNP), mga lokal nga panggamhanan, ug uban pang traffic enforcement agencies.

“Our plan is to at least have 500 deputized personnel. If we can reach 1,000 for the whole region, why not?” matud ni Dinglasan atol sa usa ka interbyu.

Miingon siya nga gikinahanglan ang pagdugang sa mga deputized personnel tungod kay limitado lamang ang gidaghanon sa plantilla personnel sa LTO nga maoy nagpatuman sa mga balaod sa trapiko sa tibuok Central Visayas.

Gipasabot usab niya nga ang mga deputized personnel moagi una sa pagbansay sa dili pa hatagan og katungod sa pagpatuman sa pipila ka probisyon sa mga balaod sa transportasyon ug sa pag-isyu og citation bisan dili sila regular nga empleyado sa LTO.

Bag-o lang nahuman sa LTO-7 ang deputation program sa Bohol ug nangandam na usab kini sa laing hugna sa pagbansay alang sa mga traffic enforcers sa tri-cities sa Sugbo.

Samtang gipalapdan usab sa LTO-7 ang pag-apod-apod sa mga breathalyzer ngadto sa dugang pang mga lokal nga panggamhanan (LGUs) sa higayon nga makadawat kini og dugang nga mga yunit gikan sa LTO Central Office.

Miingon usab siya nga ang kasikbit nga mga siyudad ug lungsod makadawat usab og breathalyzer sa higayon nga adunay dugang mga yunit aron mapalig-on ang pagpatuman sa Anti-Drunk and Drugged Driving Act.

Dugang pa ni Dinglasan nga ang resulta sa breathalyzer maoy usa sa labing importante nga ebidensiya sa pagpasaka ug pagdaug sa kaso batok sa mga hubog nga drayber sa korte.

Gipahimangnoan niya ang mga motorista nga dili gyud moinom magmaneho og sakyanan. (BANAT NEWS)