Fundraising campaigns himoon sa Operation Smile Philippines

CEBU, Philippines — Duha ka dagkong fundraising event ang himoon sa Operation Smile Philippines aron makahatag og libre nga operasyon sa mga batang Pilipino nga mga bungi ug dunay deperensiya sa nawong.

Mag-una sa kampanya ang Fundraising Gala Night nga ipahigayon sa Agosto 8, 2026 sa Grand Ballroom sa Nustar Resort Cebu ug ang duha ka adlaw nga Pickleball Fundraising Tournament sa Oktubre 17 ug 18, 2026 sa The Courts of Cebu.

Ang gala night maoy opisyal nga pagsugod sa fundraising campaign ug gilauman nga tambongan sa mga lider sa negosyo, mga pilantropo, healthcare advocates, corporate partners ug mga miyembro sa komunidad aron mosuporta sa misyon sa Operation Smile Philippines.

Matod ni Marylou Ngo, usa sa mga organizer, labaw pa sa elegante ug makalingaw nga kalihokan ang gala night.

Matud usab ni Perl Arienza, usa sa mga organizer nga ipadayon ang fundraising campaign pinaagi sa duha ka adlaw nga pickleball tournament nga gilauman mahimong usa sa labing dagkong team pickleball events sa Sugbo.

Si Rnell Arsenal, coach sa The Courts of Cebu, miingon nga gilauman ang pag-apil sa 56 ka teams ug kapin 360 ka mga atleta nga magdula sa walo ka courts gikan alas-8 sa buntag hangtod alas-10 sa gabii sa duha ka adlaw.

Sa Oktubre 17, ipahigayon ang Corporate Team Challenge ug Smiles Club Team Championships, nga tambongan sa mga kompanya, business organizations, professionals, executives ug pickleball clubs.

Samtang sa Oktubre 18, ang mga pamilya, higala, community organizations, mga empleyado ug pickleball enthusiasts sa Family & Friends Team Championship, mao ang mosalmot sa maong tournament.

Si Emiliano Romano sa Operation Smile Philippines miingon nga pinaagi sa Comprehensive Cleft Care Program, naghatag sila og padayon nga multidisciplinary treatment sa pasyente sa dili pa ug inig human sa operasyon.

Matod ni Mariquita Salimbangon-Yeung, usa sa mga nag-unang pilantropo nga nagsuporta sa Operation Smile Philippines sa Sugbo, ang matag bata angayan nga makapahiyom nga adunay pagsalig sa kaugalingon. Naglaum siya nga pinaagi sa suporta sa mga sponsors, participants, donors ug mga bisita, mas daghang kabataan ang makadawat og libre nga operasyon ug komprehensibong medikal nga pag-atiman nga makausab sa ilang kinabuhi.

Miingon si Romano nga nagtinguha ang organisasyon nga makatigom og labing menos P50 milyon pinaagi sa gala night aron matabangan ang 3,000 ka mga bata pinaagi sa libre nga operasyon.

Giawhag usab ni Salimbangon-Yeung ang publiko, corporate partners ug mga pilantropo nga ipadayon ang pagsuporta sa misyon sa Operation Smile Philippines sa paghatag og mas himsog nga pahiyom ug mas maayong kaugmaon alang sa liboan ka batang Pilipino. (BANAT NEWS)