Nanglungkab para pang-scatter

CEBU, Philippines — Gidakop sa kapulisan ang usa ka 25-anyos nga lalaki human giingong milungkab og usa ka internet café sa Barangay Tayud, Consolacion ug gikawat ang upat ka Pisonet coin boxes para ipangpusta sa scatter.

Sumala pa sa kapolisan kapin P8,000 nga kuwarta ang iyang nakuha gikan sa maong mga coin boxes.

Ang suspetsado giila lang sa angga nga “Cidrick,” anaa karon sa kustodiya sa Consolacion Municipal Police Station ug mag-atubang og kasong robbery with force upon things. Sa interbyu niadtong Huwebes, Hulyo 2, miingon si Police Lieutenant Colonel John Kareen Escober, acting chief sa Consolacion Municipal Police Station, nga atol sa ilang pagpangutana giangkon sa suspetsado nga gigasto na niini sa Scatter ang kuwarta nga nakuha.

“According sa amoang interview sa iyaha, iyaha na kunong gidula og Scatter,” matud ni Escober. Dugang ni Escober, walay record sa ila ang suspetsado bisan dugay na kining nagpuyo sa Barangay Tayud. Matud sa kapulisan, nahitabo ang insidente mga alas 12:56 sa kadlawon niadtong Miyerkules, Hulyo 1, diin iyang gilungkab ang  pultahan sa internetan sa Barangay Tayud.

Gikatahong gidala niini ang upat ka Pisonet coin boxes nga nagkantidad og P20,000 ug adunay sulod nga gibanabanang kapin P8,000 nga sensilyo.

Nadiskubrehan sa tag-iya ang pagpangawat sa dihang  nangabli na kini sa buntag ug iyang namatikdan nga naguba ang kandado samtang nawala na ang mga coin boxes.

Sa pagsusi sa ilang closed-circuit television (CCTV) footage sa establisemento nakita didto ang suspek sa iyang gipangbuhat.

Sumala sa kapulisan, namay-ungan ni Barangay Tanod David Enterina ang suspetsado pinaagi sa CCTV footage tungod kay usa kini nga gaabang sa Barangay Tayud.

Nakigtambayayong si Enterina kang mga kaubang barangay tanod nga sila Samuel Debalucos ug Susano Judaya sa pagpahigayon og follow-up operation nga misangpot sa pagdakop sa suspetsado mga alas -8 sa buntag sa Miyerkules.

Gitugyan dayon ang suspetsado sa Consolacion Municipal Police Station alang sa dugang imbestigasyon ug pagpasaka sa hustong kaso. Sa follow-up operation, nabawi sa mga otoridad ang upat ka gikawat nga Pisonet coin boxes nga gilabay sa kalibunan duol sa pinuy-anan sa suspetsado, pero wala nay sulod.

Si Police Brigadier General Arnold  Abad, regional director sa Police Regional Office-Central Visayas (PRO-7) niingon nga dako na gyud ang papel sa pag-instalar og CCTV cameras para sa paspas nga pag-ila sa nalambigit sa krimen nga makatabang sa mga imbestigador.

 “We encourage business owners and residents to install CCTV cameras in their establishments and homes, as these serve not only as a deterrent to criminal activities but also as vital pieces of evidence that can significantly speed up investigations and the arrest of offenders,” matud pang Abad. (BANAT NEWS)