CEBU, Philippines — Pipila ka opisyales sa Department of Public Works and Highways Cebu 3rd District ug duha ka kontraktro ang matud pa girekomendar sa National Bureau of Investigation Central Visayas nga pasakaan og kaso tungod sa gialegar nga duha ka ghost flood control projects.
Kaning mga proyektoha gikatahong diha nahimutang sa Barangay Singsing sa Lungsod Sa Balamban.
Sa interbyu sa mga sakop sa media kang NBI-Central Visayas Regional Director Dominador Cimafranca siya nikompirmar nga dunay gihimong imbestigasyon ang NBI-CEVRO ug NBI-CebDO sa flood control projects sa gobiyerno ubos sa ilang hurisdiksyon.
“Yes definitely wala tay gisanto nga kuan dinhi, basta any public official or any private individual conspiring to,.. sa ato pa involved into public corruption ato ng imbestigahan tanan. Evidence based man ta, dili kay giingon nga tungod sa iyang personality, atong, mo conduct ta og investigation. Lahat ng investigation ng NBI is evidence based man ta,” matud pang Cimafranca sa mga tigbalita atol sa press conference kagahapon.
Matud pa niya nga estrikto na karon ang Department of Justice dili na puydeng duna ray “probable cause” kondili “beyond certainty” gyud para siguradong makapa-kombikto gyud.
Samtang si NBI-7 Supervising Agent Gregorio Algoso Jr. miingon nga tanan nga projects ilang gitan-aw.
Apil sad sa ilang nakita ang proyekto diha sa Mandaue City nga matud pa niya dunay “technicality” kay wala gitukod sa lugar kung diin unta kini gitaganang tukoron.
Matud niya dunay pipila ka gisuspetsahang substandard apan dili pa sila makakompirmar kun tinuod ba tungod kay gikinahanglang eksperto lang makasulti ana ug kana mabuhat sa taga Commission on Audit nga mosusi kun ang gigamit nga mga materyales ug sa gidak-on sa pundong gigahin nitakdo ba.
Sumala pa nga naghimo og inspeksyon ang grupo ni Algoso niadtong Disyembre sa miaging tuig sa maong barangay ug ilang nadiskubrehan nga walay proyektong natukod nga para sa flood control. Ang ingon sa NBI-7 nga tag P80 milyones ang kada kontrata niini.
“Everybody involved, the contractors, the DPWH personnel,” matud pang Algoso kabahin sa kung kinsa ang ilang girekomendar nga pakasohan apan wala pa silay nakompirmar nga naay nalambigit nga elected officials.
Sumala pang Algozo, kasong paglapas sa Anti-Graft Practices Act ug Malversation of Public Funds ang ilang girekomendar nga ipasaka sa maong mga kontraktor ug sakop sa DPWH.
Ang ilang rekomendasyon gipasa na ngadto sa DOJ ug Independent Commission for Infrastracture para maoy mopasaka sa kaso.
Kun mahinumdoman, si Presidente Ferdinand Marcos Jr. atol sa ilang ikaupat nga State of the Nation Address (SONA) sa miaging tuig nibutyag sa mga nadiskubrehan niyang anomalya sa mga flood control projects nga diin bilyon-bilyon ka pesos ang gigahing pundo, apan ang uban niini substandard ug ang pinakagrabe mga ghost projects.
Atol sa iyang SONA, wala siya nagdiki-diki sa pag-ingon og “Mahiya naman kayo” nga ang gipasabot, mga indibidwal nga nangwarta sa maong mga proyekto nga ang katawhan maoy gaantos tungod sa mga pagbaha.
Gimando sad ni PBBM atol sa SONA ang pagtukod og Independent Commission para maghimo og imbestigasyon sa tanang mga flood control projects sulod sa nakalabay nga napulo ka tuig. Sugod ni sa kataposang tuig sa termino ni kanhi presidente Benigno “P.Noy” Aquino III ug unom ka tuig ubos ni kanhi presidente Rodrigo Duterte, dungan sa pagbahad nga walay pilion bisag kinsa kinsa pay maigo sa imbestigasyon.—Gikan sa The Freeman ug report sa One Balita Bai/ IBM BANAT NEWS