^

Banat Balita

Nutrition Month ilusad sa siyudad sa Dumaguete

Mitchelle L. Palaubsanon - Banat

CEBU, Philippines — Gipahibalo sa National Nutrition Council sa Central Visayas (NNC-7) nga ang nasudnong paglusad sa ika-52 nga Nutrition Month ipahigayon sa Dakbayan sa Dumaguete karong Hulyo 1.

Atol sa press conference kagahapon, Hunyo 29, si Dr. Niño Archie Labordo, regional nutrition program coordinator sa NNC-7, miingon nga ang maong kalihokan pagadumalahon sa hiniusang paningkamot sa Dumaguete City Government ug sa Negros Oriental Provincial Government, uban sa Rehiyon 6 ug Rehiyon 7 isip mga host.

Matod ni Labordo, ang pagpili sa Dakbayan sa Dumaguete alang sa nasudnong paglusad nagsuporta usab sa pagtukod sa opisina sa National Nutrition Council sa Negros Island Region.

Ang nasudnong kickoff maglakip og caravan, press conference, ug mga technical session. Sulod sa tibuok bulan sa Hulyo, ang NNC uban sa mga kaabag nga ahensya sama sa Department of Health (DOH) ug Department of Social Welfare and Development (DSWD), magpahigayon og nagkadaiyang kalihokan isip kabahin sa Nutrition Month sa tibuok nasod.

Miingon usab siya nga ang mga local government unit sa lainlaing bahin sa nasod magpahigayon sa ilang kaugalingong selebrasyon sa Nutrition Month, samtang ang mga eskwelahan ug mga miyembro sa Regional Nutrition Committee nag-andam usab og mga kalihokan aron mapalambo ang kahibalo sa hustong nutrisyon.

Gipasabot ni Labordo nga ang Nutrition Month, nga gisaulog matag bulan sa Hulyo subay sa Presidential Decree No. 491, nagtumong sa pagpalambo sa kahibalo sa publiko bahin sa kamahinungdanon sa hustong nutrisyon ug sa paglig-on sa kolaborasyon aron masulbad ang tanang matang sa malnutrisyon.

Ang tema karong tuiga nga, “Nutrition at Kalikasan, Ating Pangalagaan,” naghatag og gibug-aton sa lig-on nga kalambigitan tali sa nutrisyon ug pagpanalipod sa kinaiyahan.

Matod ni Labordo, importante ang pag-atiman sa kinaiyahan tungod kay kini mao ang tinubdan sa pagkaon nga gikinahanglan aron mapadayon ang maayong panglawas.

Midugang siya nga ang pagpakunhod sa malnutrisyon nagpabiling nahiuyon sa Philippine Plan of Action for Nutrition, Philippine Development Plan, ug sa Vision 2040 sa nasod. (BANAT NEWS)

NUTRITION MONTH

  • Latest
Latest
Latest
abtest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with